आंदोलनात सहभागी व्हा

संच मान्यतेविरोधातातील
आंदोलनात सहभागी व्हा

राधानगरी तालुकाध्यक्ष वागरे, सरचिटणीस पाटील यांचे आवाहन

सकाळ वृत्तसेवा
सरवडे, ता. ११ : संच मान्यतेच्या अन्यायकारक शासन निर्णयामुळे अनेक शिक्षक अतिरिक्त ठरून शाळांची गुणवत्ता खालावण्याची शक्यता निर्माण झाली आहे. पर्यायाने सरकारी शाळा बंद पडून बहुजनांचे शिक्षण संपण्याचा धोका निर्माण झाला आहे. या निर्णयाला विरोध करण्यासाठी शाळेच्या पहिल्याच दिवशी १५ जूनला शिक्षक समिती राज्यभरात जिल्हाधिकारी कार्यालयासमोर आंदोलन करणार आहे. सर्व शिक्षकांनी या दिवशी कोल्हापूर जिल्हाधिकारी कार्यालयासमोर होणाऱ्या आंदोलनात सहभागी व्हावे, असे आवाहन शिक्षक समितीचे राधानगरी तालुकाध्यक्ष विक्रम वागरे व सरचिटणीस विकास पाटील यांनी केले आहे.
संच मान्यतेच्या नवीन शासन निर्णयामुळे अनेक शाळेतील मुख्याध्यापक पद रद्द होणार असल्याने शाळांना प्रशासनप्रमुखच उरणार नाही. त्याशिवाय नव्याने लादलेल्या जाचक अटींमुळे पटाअभावी जर एखाद्या शाळेत शिक्षक अतिरिक्त झाला तर पुन्हा पट वाढला तरी त्या शाळेत नवा शिक्षक मिळणे कठीण बनले आहे. अशा निर्णयामुळे सर्वसामान्य कुटुंबांतील मुलांना मोफत आणि दर्जेदार शिक्षण देणाऱ्या सरकारी प्राथमिक शाळा बंद पडण्याचा धोका निर्माण झाला आहे. त्यामुळे मुलांचा सक्तीच्या व मोफत शिक्षणाचा हक्क हिरावला जाऊन खासगी शाळांचे पेव फुटल्याशिवाय राहणार नाही. त्यामुळे सरकारी प्राथमिक शाळा टिकाव्यात, यासाठी या वर्षाच्या शाळेच्या पहिल्याच दिवशी १५ जूनला प्राथमिक शिक्षक राज्यभरात जिल्हाधिकारी कार्यालयासमोर धरणे आंदोलन करणार आहे. सर्व शिक्षकांनी आंदोलनात सहभागी व्हावे, तसेच समाजातील सूज्ञ नागरिकांनी आंदोलनाला पाठिंबा द्यावा, असे आवाहन वागरे व पाटील यांनी केले आहे.
...............