सरूड

01699
नवे पारगाव : संपर्क दौऱ्यावेळी महाविकास आघाडीचे उमेदवार सत्यजित पाटील-सरूडकर, आमदार राजू आवळे, माजी आमदार सुजित मिणचेकर व महाविकास आघाडीचे कार्यकर्ते.
...
मतदार यावेळी निश्चित बदल घडवतील
सत्यजित पाटील : निलेवाडी, जुने पारगाव, नवे पारगाव, चावरे परिसरात संपर्क दौरा
सरुड, ता. २९ : ‘हातकणंगले लोकसभा मतदारसंघात मला मिळत असलेल्‍या मतदारांचे समर्थन पाहून प्रतिस्पर्धी उमेदवारांना धडकी भरली आहे. दोघांच्याही निष्क्रिय कारभाराला कंटाळलेली जनता यावेळेला निश्चित बदल घडवेल,’ असे प्रतिपादन महाविकास आघाडीचे उमेदवार सत्यजित पाटील-सरुडकर यांनी केले. ते रविवारी निलेवाडी, जुने पारगाव, नवे पारगाव, चावरे, तळसंदे, पाडळी, मनपाडळे, अंबपवाडी व कासारवाडी या गावांच्या संपर्क दौऱ्यावेळी बोलत होते.
सत्यजित पाटील म्हणाले, ‘गेल्या दहा वर्षांच्या काळामध्ये हातकणंगले लोकसभा मतदारसंघाला जेवढ्या प्रमाणात निधी आणि पायाभूत सुविधा मिळायला पाहिजे होत्या, तेवढ्या प्रमाणात त्या मिळाल्या नाहीत. मी संपर्काला कुठेही कमी पडणारा माणूस नाही किंवा मला कोणाच्याही मध्यस्थीची गरज नाही. सर्वसामान्य माणूस मला थेट येऊन आपले काम सांगू शकतो. ज्यांना निवडून येण्याची गॅरंटी नाही ते आता माझ्या विरोधात पैसा आणि टीकेचा वापर करू पाहत आहेत.’ या संपर्क दौऱ्यावेळी हातकणंगले विधानसभा मतदारसंघाचे आमदार राजू आवळे, माजी आमदार सुजित मिणचेकर, माजी आमदार राजीव आवळे, शिवसेना जिल्हाप्रमुख संजय चौगुले यांची प्रमुख उपस्थिती होती.