शालेय पोषण आहारात पौष्टिकता वाढवणाऱ्या पाककृतीचा समावेश

पौष्टिकता वाढवणाऱ्या पाककृतीचा
शालेय पोषण आहारात समावेश
सकाळ वृत्तसेवा
साने गुरुजी वसाहत, ता. २७ : प्रधानमंत्री पोषण शक्ती निर्माण योजनेअंतर्गत ऑगस्ट व सप्टेंबर महिन्याकरिता पौष्टिकता वाढवण्याच्या दृष्टिकोनातून दोन नव्या पाककृती तयार करण्यात आल्या आहेत. त्यानुसार विद्यार्थ्यांना आहार शिजवून देणे, बचत गटांना बंधनकारक राहणार आहे.
सोमवार, बुधवार, शुक्रवार या दिवशी व्हेजिटेबल पुलाव, मसालेभात, मसुरी पुलाव, मटार पुलाव, सोयाबीन पुलाव, अंडा पुलाव यापैकी एक देण्यात येणार आहे. मंगळवार, गुरुवार, शनिवार भाताबरोबर कडधान्याची उसळ किंवा भाजी किंवा आमटी, मोड आलेल्या मटकीची उसळ किंवा मूगडाळ खिचडी किंवा मोड आलेले कडधान्य देण्यात येईल.
केंद्र शासनाच्या प्रधानमंत्री पोषणशक्ती निर्माण योजनेअंतर्गत विद्यार्थ्यांना आहार लाभ देण्यासाठी स्थानिकस्तरावर उपलब्ध होणाऱ्या अन्नपदार्थांचा व तृणधान्याचा समावेश करून आहाराचा दर्जा व गुणवत्ता वाढीच्या दृष्टीने हा बदल करण्यात आला आहे. याविषयी प्राथमिक शिक्षण समितीचे प्रशासन अधिकारी आर. व्ही. कांबळे यांनी केंद्रीय स्वयंपाक घर प्रणाली अंतर्गत सर्व कार्यरत बचत गटांना कळवले आहे. संबंधित गटांनी त्यानुसार अन्न शिजवून देण्याचे आहे, असे प्रशासन अधिकारी कांबळे यांनी परिपत्रकाद्वारे कळवले आहे.