प्राथमिक शाळांमध्ये पायाभूत साक्षरता आणि संख्याज्ञान साध्य करणे ही शिक्षण व्यवस्थेची सर्वोच्च प्राथमिकता : महेश चोथे

02360
‘निपुण भारत अभियान
यशस्वीतेसाठी पुढाकार घ्यावा’

सानेगुरुजी वसाहत, ता. १० ः प्राथमिक शाळांमध्ये पायाभूत साक्षरता आणि संख्याज्ञान साध्य करणे ही शिक्षण व्यवस्थेची सर्वोच्च प्राथमिकता असून त्यासाठी निपुण भारत अभियान यशस्वी करण्यासाठी शाळा, शिक्षक व समाजातील सर्व घटकांनी पुढाकार घेण्याची आवश्यकता आहे, असे मत शिक्षण उपसंचालक महेश चोथे यांनी व्यक्त केले.
फुलेवाडीतील प्रबुद्ध भारत हायस्कूलमधील शिक्षक क्षमता वृद्धी प्रशिक्षणस्थळी भेटीवेळी ते बोलत होते. यावेळी प्रशासन अधिकारी आर. व्ही. कांबळे, ‘डायट’चे अधिव्याख्याते टी. एम. कुंभार, शैक्षणिक पर्यवेक्षक चंद्रकांत कुंभार, खासगी प्राथमिक शिक्षक महासंघाचे राज्य सचिव राजेंद्र कोरे, विक्रम भोसले उपस्थित होते.
श्री. चोथे म्हणाले, ‘‘राष्ट्रीय शिक्षण धोरण २०२० नुसार प्राथमिक स्तरावर २०२६.२७ पर्यंत पायाभूत भाषिक व गणितीय कौशल्य प्राप्त करण्यास सर्वोच्च प्राधान्य देण्यात आले आहे. त्यातील प्राथमिक शाळांमध्ये पायाभूत साक्षरता आणि संख्याज्ञान साध्य करणे आवश्यक आहे. यासाठी नास, असर यासारख्या राष्ट्रीय, राज्य स्तरावर विविध सर्वेक्षण अहवालामध्ये राज्यातील शाळामधील विद्यार्थ्यांच्या शैक्षणिक प्रगतीबाबतची स्थिती दर्शनात आली आहे त्यामध्ये बदल घडवून आणण्यासाठी सर्व घटकांनी लक्ष केंद्रित करणे आवश्यक आहे.’ राजेंद्र कोरे यांनी स्वागत व प्रास्ताविक केले.