देश घडवणारा अभियंता व्हा : डॉ. विनय कोरे कोरे अभियांत्रिकीत प्लेसमेंट डे चे यशस्वी आयोजन

04572

देश घडवणारा अभियंता व्हा
डॉ. विनय कोरे ः कोरे अभियांत्रिकीत ‘प्लेसमेंट डे’

सकाळ वृत्तसेवा

वारणानगर, ता. १६ : ‘तुमची व आई-वडिलांची स्वप्ने घेऊन तुम्ही वारणेत आला. उत्कृष्ट अभियंते म्हणून स्वतःला सिद्ध केले. देश घडवणारा अभियंता बनण्याचा प्रयत्न करा,’’ असे आवाहन वारणा विविध उद्योग शिक्षण समूहाचे अध्यक्ष डॉ. विनय कोरे यांनी केले.
येथील तात्यासाहेब कोरे इन्स्टिट्यूट ऑफ इंजीनिअरिंग अँड टेक्नॉलॉजी (ऑटोनॉमस) महाविद्यालयात विविध कंपन्यांत निवड झालेल्या विद्यार्थ्यांच्या गौरवानिमित्त आयोजित केलेल्या प्लेसमेंट डे समारंभात ते बोलत होते. वारणा विभाग शिक्षण मंडळाचे मुख्य कार्यकारी अधिकारी डॉ .व्ही. व्ही. कारजिन्नी म्हणाले, ‘‘तुम्ही अभियंत्यांनी स्वतःला सिद्ध केलेले आहे. भविष्यात कंपनीकडून असणाऱ्या आव्हानांचा सामना करण्यासाठी तत्पर राहा. महाविद्यालयातील प्राध्यापकांना इंडस्ट्री कनेक्ट प्रशिक्षण दिले जाईल.’’ ट्रेनिंग अँड प्लेसमेंट ऑफिसर प्रा. पी. जे. पाटील यांनी यावर्षी आत्तापर्यंत ५०० हून अधिक विद्यार्थ्यांचे विविध कंपन्यांमध्ये प्लेसमेंट झाले. ई अँड टीसी विभागाचे सलग ५ वर्षे १०० टक्के प्लेसमेंट झाल्याचे सांगितले. २०२४-२५ बॅचचे प्लेसमेंट याच वर्षी मे महिन्यात सुरू झाले. त्यामध्ये ३ विद्यार्थ्यांना ५.५ लाख रुपयांचे पॅकेज मिळाले.

निवड झालेल्या विद्यार्थ्यांनी तात्यासाहेब कोरे यांनी सुरू केलेल्या अभियांत्रिकी महाविद्यालयाप्रति कृतज्ञता व्यक्त केली. वैष्णवी उलपे (७.५ लाख- रिलायन्स), साक्षी शिंदे (६.५ लाख टेक्निमोंट), हर्षल निकम (६.५ लाख-टेक्निमोंट), शंकर कारंडे ( ६.४ लाख टोयो), ऋतूजा बकरे (५ लाख नीलसोफ्ट), दीपांजली कुंभार (तृतीय वर्ष ५.५ लाख ॲटलास कॉपको).
यावेळी अधिष्ठाता डॉ. एस. एम. पिसे, प्रभारी प्राचार्य डॉ. डी. एन. माने, प्रा. आर. सी. शिक्केरी उपस्थित होते. सकाळच्या सत्रात निवड झालेल्या विद्यार्थ्यांचा विभागांत ५०० हून अधिक विविध कंपन्यांमध्ये निवड झालेल्या विद्यार्थ्यांना प्रशस्तिपत्र व टी-शर्ट देऊन सत्कार झाला. कार्यक्रमाच्या आयोजनासाठी सर्व विभागांच्या ट्रेनिंग आणि प्लेसमेंट समन्वयकांनी अथक परिश्रम घेतले.