भोगावती तोडणी नियोजन

भोगावती साखर कारखान्याचे
६ लाख टन ऊस गाळपाचे उद्दिष्ट
राशिवडे बुद्रुक, ता. ११ : भोगावती सहकारी साखर कारखान्याचा तोडणी कार्यक्रम शेतकऱ्यांना त्रासक ठरू लागल्याने पुढील हंगामात शेतकरी हिताचे धोरण कारखान्याने ठरवले आहे. आगामी हंगामात ६ लाख टन ऊस गाळपाचे उद्दिष्ट ठेवले असून त्या दृष्टीने ऊस तोडणी वाहतुकीसाठी अभिनव मोहीम राबवली आहे. ऊसतोडणी यंत्रणेत आमूलाग्र बदल करणार असल्याची माहिती अध्यक्ष शिवाजीराव पाटील व उपाध्यक्ष राजाराम कवडे यांनी पत्रकार बैठकीत दिली.
साखर कारखान्यांना ऊसतोडणी मजुरांच्या टंचाईमुळे अनेक समस्यांना तोंड द्यावे लागत आहे. त्यामुळे तोडणी ओढणी यंत्रणा विस्कळीत होत आहे. हा प्रश्न सोडवून ऊस उत्पादकांचा ऊस पाळी पत्रकाप्रमाणे वेळेवर तोडण्यासाठी कारखान्यां ने तोडणी वाहतूक संघटनेशी चर्चा करून नवीन योजना राबवण्याचा निर्णय घेतला आहे. अनेक वर्षे कारखाना वाहनांना आगाऊ उचल देत नाही. मात्र कारखाना आगामी हंगामात काही अंशी व्याजाचा भार उचलणार आहे, असे पाटील व कवडे यांनी सांगितले.
योजनेनुसार प्रत्येक गटाचे नियोजन स्वतंत्रपणे केले आहे. वाहनांची हंगामातील उपस्थिती आणि ओढलेले टनेज यानुसार हे नियोजन केले आहे. त्यामुळे किमान आठशे वाहनांचे करार होतील. त्याचबरोबर सहा लाख टनांचे गाळप उद्दिष्टही पूर्ण होईल, असे त्यांनी सांगितले. कारखान्याने ऊसतोडणी यंत्रासाठीही योजना राबवली जाणार असल्याचे त्यांनी सांगितले. यावेळी संचालक धिरज डोंगळे, शिवाजीराव कारंडे, पांडुरंग पाटील , अभिजित पाटील, तानाजी काटकर, कार्यकारी संचालक संजय पाटील, सचिव उदय मोरे, ऊस वाहतूक संघटनेचे अध्यक्ष आर. वाय. पाटील व पदाधिकारी उपस्थित होते.