अपघात

दुचाकीस्वाराला चुकवताना
मोटार झाडाच्या बुंध्याला धडकली

राधानगरी-गैबी तिट्टा दरम्यान अपघात; तिघे जखमी

सकाळ वृत्तसेवा
राधानगरी, ता. ५ : राधानगरी-गैबी तिट्टा दरम्यान बाळूमामाच्या देवदर्शनासाठी निघालेल्या मालवण येथील कुटुंबीयांच्या मोटारीला आज दुपारी अपघात झाला. सुदैवाने कोणतीही जीवितहानी झाली नाही. दुचाकीस्वाराला चुकवताना मोटार रस्त्याच्या कडेला उलटली.
घटनास्थळावरून मिळालेल्या माहितीनुसार मालवणहून आदमापूर येथील बाळूमामाच्या देवदर्शनासाठी निघाले होते. राधानगरी येथील गैबी येथे आले असता अचानक आडवी आलेल्या दुचाकीला चुकवताना चालक सुमित ठोंबरे यांची मोटार (एमएच ०७ एजी ७८५०) रस्त्याच्या कडेला असणाऱ्या झाडाच्या बुंध्याला धडकून उलटली. यामध्ये श्रेया साळगावकर (वय ३०) यांच्या डोक्याला मार लागला. जयवंत मयेकर यांच्या उजव्या हाताला, तर मानस पाटकर (वय १०) याच्या हाताला दुखापत झाली आहे. घटनेची माहिती राधानगरी पोलिसांना समजताच घटनास्थळी पोलिस दाखल झाले व अपघातातील व्यक्तींना राधानगरी येथील खासगी रुग्णालयात उपचारासाठी पाठवले आहे.