‘भोगावती शिक्षण’बाबतचा कैफियत मोर्चा रद्द : पाटील

‘भोगावती शिक्षण’बाबतचा
कैफियत मोर्चा रद्द : पाटील
राशिवडे बुद्रुक, ता. ५ : भोगावती शिक्षण प्रसारक मंडळाबाबत धर्मादाय उपायुक्त यांना दिलेला बदल अर्ज मागे घेऊन निवडणूक प्रक्रिया घेण्याच्या निर्णयामुळे उद्या (ता. ६) होणारा कैफियत आंदोलन मोर्चा रद्द करण्यात आला आहे, अशी माहिती मोर्चाचे नेते डॉ. जालंदर पाटील यांनी दिली आहे.
डॉ. पाटील म्हणाले, ‘‘भोगावती शिक्षण प्रसारक मंडळ हे ३२ हजार सभासदांचे राहावे यासाठी भोगावती कारखान्याच्या सर्वसाधारण सभेमध्ये सहा तारखेला शिक्षण प्रसारक मंडळाचे अध्यक्ष जयसिंगराव हुजरे व ए. वाय. पाटील यांच्या दारासमोर कैफीयत आंदोलन करण्याचा इशारा दिला होता. मात्र याच दरम्यान या संदर्भात बैठक झाली. या बैठकीला ए. वाय. पाटील, पी. डी. धुंदरे, शिवाजीराव पाटील, राजाराम कवडे, के. बी. पाटील, ए. डी. चौगले, जयसिंगराव हुजरे, सर्जेराव पाटील ,पांडुरंग पाटील, बंडोपंत वाडकर, सरदार पाटील उपस्थित होते. या बैठकीत सर्वानुमते शिक्षण प्रसारक मंडळाचे बदल अर्ज मागे घेऊन निवडणूक प्रक्रिया पूर्ण करण्यासाठी धर्मादाय उपायुक्त यांच्याकडे लेखी मागणी करण्याचे ठरले. त्या अनुषंगाने अध्यक्ष हुजरे व उपाध्यक्ष सर्जेराव पाटील यांच्यासह आणखी तीन संचालकांनी लेखी संमती पत्र लिहून दिलेले आहे.’’