युतीवेळी मिरज भाजपला सोडणे चूकच; उद्धव ठाकरे

सांगली : ‘‘मिरज विधानसभा मतदारसंघ हा हिंदुत्वाचा बालेकिल्ला आहे. तो भाजपला सोडणे ही चूकच होती. ती आता सुधारू, मिरजेत पुन्हा शिवसेना वाढवू. त्यासाठी मी स्वतः लक्ष घालेन. क्रांतिकारकांचा जिल्हा शिवसेनेला साथ देईल, असे काम उभे करा’’, अशी सूचना शिवसेना पक्षप्रमुख उद्धव ठाकरे यांनी केली. जिल्ह्यातील प्रमुख पदाधिकाऱ्यांनी आज मुंबईत ‘मातोश्री’वर जाऊन ठाकरे यांची भेट घेतली. प्रा. नितीन बानुगडे-पाटील यांनी बैठक आयोजित केली होती. जिल्हा प्रमुख संजय विभुते, माजी जिल्हाप्रमुख बजरंग पाटील, महिला आघाडी प्रमुख सुजाता इंगळे आदी उपस्थित होते. श्री. ठाकरे यांनी शिवसेनेच्या निष्ठावंतांसोबत फोटोसेशनही केले. प्रमुख पदाधिकाऱ्यांनी जमिनीवर भारतीय बैठक घालत ठाकरेंसोबत छायाचित्र काढून घेतले.

‘ही वेळ टळेल, एकजुटीने लढूया’, असेही त्यांनी आश्‍वस्त केल्याचे विभुते यांनी सांगितले. श्री. ठाकरे म्हणाले, ‘‘सांगली जिल्ह्यात शिवसेना फारशी रुजत नाही, असे मला वाटत होते. त्यामुळे तिकडे थोडे दुर्लक्ष झाले. मिरजेसारखा प्रमुख मतदारसंघ युतीमध्ये भाजपला सोडून चूक केली. आता हिंदुत्ववादी जिल्हा म्हणून ताकदीने काम करू. एकजुटीने संघटनात्मक बांधणी ताकदीने करा. मी स्वतः सांगलीत लक्ष घालणार आहे. दिवस असेच राहणार नाहीत. ते पालटणार आहेत. छत्रपती शिवाजी महाराजांना स्वकियांविरुद्ध अधिक लढाया कराव्या लागल्या. आपल्यालाही तेच करावे लागत आहे. शेवटी विजय शिवरायांचा झाला. आताही शिवसेनाच जिंकेल. कठीण काळात तुम्ही सोबत राहिलात, हा विजयच आहे.’’

जिल्हा प्रमुख विभुते म्हणाले, ‘‘जिल्ह्यात ८० टक्के पदाधिकारी सोबत आहेत. तुमची मुख्यमंत्री म्हणून केलेली कामे मनात, हृदयात आहेत. सर्वांची आस्था कायम आहे. गद्दारी झाली असली तरी महाराष्ट्राला सगळं कळलं आहे. लोक बोलत आहेत.’’

मयूर घोडके, चंदन चव्हाण, रूपेश मोकाशी, रणजित जाधव, हरिदास लेंगरे, मारुती पवार, नागनाथ मोटे, सरोजनी माळी, मनीषा पाटील, सनी कोरे, मयूर गायकवाड, पप्पू शिंदे, महादेव हुलवान, सुभाष मोहिते आदी उपस्थित होते.