शिराळा तालुक्‍यात येथे बिबट्याचा हल्ला...दोन कालवडी ठार

सकाळ वृत्तसेवा
शुक्रवार, 29 मे 2020

शिराळा (सांगली)- बिऊर (ता. शिराळा) येथील संजय आनंदा पाटील यांच्या वस्तीवरील जनावरांच्या शेडमधील दोन कालवडी बिबट्याने हल्ला करून ठार केल्या. ही घटना गुरुवारी मध्यरात्रीच्या सुमारास घडली.

शिराळा (सांगली)- बिऊर (ता. शिराळा) येथील संजय आनंदा पाटील यांच्या वस्तीवरील जनावरांच्या शेडमधील दोन कालवडी बिबट्याने हल्ला करून ठार केल्या. ही घटना गुरुवारी मध्यरात्रीच्या सुमारास घडली.

याबाबत घटनास्थळावरून मिळालेली माहिती अशी- बिऊर गावाच्या पश्‍चिमेला गावानजीक संजय पाटील यांचे जनावरांचे शेड आहे. गुरुवारी नेहमीप्रमाणे जनावरांना वैरण घालून ते घरी आले. आज शुक्रवारी पहाटे साडेपाच वाजण्याच्या सुमारास वस्तीवर गेल्यानंतर जनावरांच्या गोठ्यात एक कालवड मृतावस्थेत आढळून आली, तर दुसरी कालवड जागेवर नव्हती. शेड परिसरात शोध घेतला असता दोनशे मीटर अंतरावर शेजारील उसाच्या शेतात बिबट्याने नेऊन ती फस्त केल्याचे आढळून आले.

या बाबत पाटील यांनी वन विभागाला माहिती दिली. त्यावेळी वन विभागाचे वनरक्षक सचिन पाटील, बाबा गायकवाड, वनपाल चंद्रकांत देशमुख, संतोष कदम यांनी घटनास्थळी भेट दिली. घटनास्थळी बिबट्याचे ठसे आढळून आले. त्यामुळे हा हल्ला बिबट्यानेच केला असल्याचे सिद्ध झाले.

यावेळी वनरक्षक सचिन पाटील म्हणाले की, या परिसरात वन्यप्राण्यांचा वावर असून रात्रीच्या शेतात जाताना बॅटरी किंवा मोबाईलवर गाणी लावून जावे. शेतात काम करत असताना आजूबाजूला लक्ष ठेवावे. रात्री जनावरे बंदिस्त गोठ्यात बांधावीत. गोठ्यात रात्री लाईट लावावी. लहान मुले अंगणात खेळत असताना त्यांच्यावर लक्ष ठेवावे. बिबट्याच्या हल्ल्याने आज सकाळपासून बिऊर परिसरातील नागरिक धास्तावले आहेत. गेल्या पाच-सहा महिन्यांपासून कांदे मांगले, शिंगटेवाडी परिसरामध्ये बिबट्याचा वावर व जनावरांवरील हल्ले सुरू असल्याने नागरिकांच्यात भीतीचे वातावरण निर्माण झाले आहे. त्यामुळे वन विभागाने या बिबट्याचा तातडीने बंदोबस्त करावा, अशी मागणी नागरिकांच्यातून होत आहे. 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Leopard attack in Shirala taluka