Video : तिकडे देव कोंडला अन इकडे फुलांनी घेतलं गाडून

श्रीरामपूर : लाॅकडाउनमुळे राज्यासह देशभरातील विविध धार्मिक स्थळे, विविध मंदिरांना कुलूप लागले आहे. मंदिरातील पूजा-आरत्या साध्या पद्धतीने सुरु आहे. पूजेतही फुलांचा वापर केला जात नाही. त्याचा परिणाम फूल बाजारावर झाला आहे. फुलांना ग्राहक नसल्याने फुलशेती अडचणी आहे.

शेतमालांसह फुलबाजार ठप्प असल्याने व्यापाराचे चक्र कोलमडले आहे. सर्वत्र मंदिर बंद असल्याने धार्मिक उत्सव सोहळे थांबले आहेत. सध्या बाजारपेठातील फुलांची मागणी थांबल्याने फुल उत्पादक शेतकरी आर्थिक कोंडीत सापडला आहे. तालुक्यातील खंडाळा येथील सुजित डेंगळे या तरुण शेतकऱ्याने यंदा आपल्या शेतात भरउन्हाळ्यात सुमारे १५ एकर क्षेत्रावर झेंडू फुलांची बाग फुलवली. परंतु त्यांची फुलबाग यंदा लाॅकडाऊनच्या कचाट्यात सापडली आहे. डेंगळे यांच्यासह तालुक्यातील अनेक शेतकरी फुलशेतीकडे मोठ्या आशेने वळाली. आणि फसल्याचे सांगतात.

फुलांचा बाजार ठप्प

डेंगळे यांनी झेंडूच्या शेतीसाठी मशागत करुन लाखो रुपयांचा खर्च केला. त्यासाठी त्यांना कुटुंबातील अन्य सदस्यांची साथ मिळाली. मेहनतीच्या जोरावर फुलवलेली झेंडुची बाग आज कोरोनाच्या वैश्विक संकटात उपटुन टाकण्याची वेळ त्यांच्यावर ओढावली आहे. सध्या त्यांच्या झेंडूच्या बागेत उत्तम प्रतीची फुले तयार झाली अाहेत. फुलांना ग्राहक नसल्याने त्यांची कोंडी झाली आहे. सर्वच मंदीर बंद असल्याने फुलांचा बाजार ठप्प आहे. जिल्हाबंदीमुळे फुलांची वाहतूक होत नाही. अखेर करायचे तरी काय, असा प्रश्न शेतकऱ्यांसमोर आहे. त्यामुळे डेंगळे यांनी आता फुलांची बाग तोडून टाकण्यास सुरुवात केली आहे. 

शेतकरी अडचणीत

तालुक्यातील फुलासाठी शिर्डीसह मुंबई व जिल्ह्यातील विविध धार्मिक स्थळावरील बाजारपेठ आहे. खंडाळा परिसरातील अनेक शेतकऱ्यांनी २५ ते ३० एकर क्षेत्रावर झेंडूची लागवड केली आहे. लाॅकडाऊनमुळे फुलशेती अडचणीत आली आहे. त्यामुळे शेतकऱ्यांना आर्थिक अडचणीला सामोरे जावे लागत असल्याचे महेश मरकडे, सुनील ढोकचौळे, संदीप ढोकचौळे, राहुल शिंगोटे, महेश ढोकचौळे, राजेश ढोकचौळे, शशिकांत डेंगळे, अक्षय डेंगळे, प्रताप ढोकचौळे, जनार्दन डेंगळे या शेतक ऱ्यांनी सांगितले. प्रशासनाने फुलशेतीचे पंचनामे करून तात्काळ भरपाई जाहीर करावी, अशी मागणी त्यांनी केली आहे.

रूपयाचेही उत्पन्न नाही

झेंडूच्या बागेसाठी ६० ते ७० हजार रुपये एकरी खर्च झाला आहे. यंदा खर्च करुन एक रुपयाचे उत्पन्न मिळाले नाही. लाॅकडाउननंतर फुलांची प्रत घसरणार आहे. त्यामुळे फुलांची झाडे तोडून टाकण्याशिवाय आमच्यासमोर दुसरा पर्याय नाही. सरकारने आता फुलशेतीसाठी आर्थिक मदत जाहीर करुन शेतकऱ्यांना आर्थिक कोंडीतून बाहेर काढावे.

- सुजित डेंगळे, फुल उत्पादक शेतकरी, (खंडाळा, श्रीरामपूर)