Video : बेळगावात पाणी पुरवठा मंडळाची मुख्य पाईपलाईन फुटली; लाखो लीटर पाणी रस्त्यावर

बेळगाव : गोवावेस येथे स्मार्ट सिटीअंतर्गत खाऊ कट्ट्याचे काम सुरु आहे. मंगळवारी (9) सकाळी साडेसातच्या सुमारास कुपनलिका खोदाईच्या कामावेळी पाणी पुरवठा मंडळाची मुख्य जलवाहिनी फूटून लाखो लीटर पाण्याची नासाडी झाली. मुख्य जलवाहिनी असल्याने पाण्याचे फवारे सुमारे 80 ते 100 फुटापर्यंत उडत होते. गोवावेस मुख्य रस्त्याला काही वेळ तलावाचे स्वरुप प्राप्त झाले होते.

गोवावेस येथे चार दिवसांपूर्वी खाऊ कट्ट्याचे उद्‌घाटन करण्यात आले आहे. काही गाळ्यांचे काम अजूनही सुरु आहे. प्रत्यक्षदर्शनिकडून मिळालेल्या माहितीनुसार या ठिकाणी कुपनलिका खोदाईचे काम सुरु होते. खोदाई करते वेळीच मुख्य जलवाहिनी फूटली. सुमारे अर्धा तास पाण्याचे फवारे उडत होते. सकाळी 8.10 मिनीटांनी पाणी पुरवठा मंडळाच्या अधिकाऱ्यांना याची माहिती मिळाल्यानंतर पाणी बंद करण्यात आले. तोपर्यंत लाखा लिटर पाण्याची नासाडी झाली होती. स्मार्ट सिटीच्या या गलथान कारभाराचा फटका बेळगावकरांना बसला आहे.

हेही वाचा - बहिणीबरोबरचे भांडण मिटवण्यासाठी घरी बोलावून मेहुण्यालाच केली मारहाण -

लक्ष्मी टेकडीपासून घुमटमाळकडे गेलेली ही पाणी पुरवठा मंडळाची मुख्य जलवाहिनी आहे. लक्ष्मी टेकडीवर पाणी शुद्ध करून घुमटमाळ येथे सोडले जाते. याठिकाणाहून त्या भागातील रहिवाशांना पाणी सोडले जाते. मंगळवारी सकाळी पाणी सोडले असतानाच जलवाहिनी फुटल्याने पाणी वाया गेले. पाणी पुरवठा मंडळाने तातडीने काम हाती घेतले होते. मंगळवारी सायंकाळपर्यंत दुरुस्ती केली जाईल. अशी माहिती त्यांनी दिली.

याठिकाणी स्मार्ट सिटीचे काम सुरु होते. सुमारे अर्धा तास पाणी वाया गेले. माहिती मिळाल्यानंतर तातडीने पाणी बंद केले. मुख्य जलवाहिनी असल्याने जादा पाणी वाया गेले. मंगळवारी सायंकाळपर्यंत दुरुस्ती केली जाईल.

- उमेश शिगिहळ्ळी, सहाय्यक कार्यकारी अभियंते, पाणी परवठा मंडळ

संपादन - स्नेहल कदम