संभाजी भिडेंकडून विष पेरण्याचे काम : गायकवाड 

नगर: संभाजी भिडे कोरेगाव-भिमा दंगलप्रकरणातील आरोपी आहेत. परंतु, पोलिस त्यांना अटक करू शकत नाही. मुख्यमंत्र्यांच्या आश्रयाखाली भिडे समाजामध्ये विष पेरण्याचे काम करत आहेत, असे मत रिपब्लिकन पक्षाचे ज्येष्ठ नेते अशोक गायकवाड यांनी मांडले. 

शहरातील पटेल मंगल कार्यालयामध्ये आज सकाळी शिवप्रतिष्ठान हिंदूस्तानचे संस्थापक संभाजी भिडे यांची सभा झाली. आज सकाळी त्यांच्या सभेला परवानगी देण्यात आली होती. तर, दुसरीकडे भिडेंच्या विरोधात आंबेडकरवादी संघटनांनी एल्गार मोर्चा काढला होता. नवीन टिळक रस्त्यावरील डॉ. बाबासाहेब आंबेडकर सभागृहापासून निघालेला एल्गार मोर्चा पोलिसांनी हॉटेल नंदवनजवळ अडवला. कार्यकर्त्यांची तेथे भाषणे झाली.

यावेळी गायकवाड म्हणाले, भिडेंनी सोलापूर, सांगली, सातारा परिसरात समाज व्यवस्थेत विष पेरण्याचे काम करून व्यवस्थेला दंश केला आहे. मुख्यमंत्री, पंतप्रधानांबरोबर त्यांचे फोटो सोशल मीडियावर दिसतात ही दुर्दैवी गोष्ट आहे. आरोपी नगरमध्ये येवून सभा घेतो. पोलिस त्याला सभा घेण्यास परवानगी देतात, ही लाजिवाणी गोष्ट आहे. यापुढे भाजप सरकारची सत्ता येण्याचे विसरून जा ! त्याचे कंबरडे मोडल्याशिवाय कार्यकर्ते स्वस्थ बसू शकणार नाहीत. यावेळी अजय साळवे, सुरेश बनसोडे, सोमा शिंदे, सुमीत गायकवाड यांचीही भाषणे झाली.