सांगलीत आढळला दुर्मिळ पोवळा 

सांगली ः भारतात अतिशय दुर्मिळ असलेला "पोवळा' साप आढळून आला. शिंदेमळा परिसरात तो आढळून आला. नागरिकांनी कळवताच प्राणी मित्र मुस्तफा मुजावर, रफिक मुजावर, मंदार शिंपी यांनी तातडीने धाव घेत त्याला ताब्यात घेतले आणि वन विभागाच्या मदतीने त्याला निसर्गात मुक्त केले. 

आपल्याकडे आढळणारा पोवळा हा साप अतिशय दुर्मिळ आहे. महाराष्ट्र, गुजरात, पश्‍चिम बंगाल, तमिळानाडू आणि कर्नाकातील अनेक ठिकाणी त्याचा आधिवास आहे. या सापाला हिंदीत कालाधारी मूंगा म्हणतात. इंग्रजीत त्याचे नाव कोरल स्नेक असे आहे. तर शास्त्रीय भाषेत त्याला कॅलीओपीस मेलानुरुस (Calliopfis melanurus) म्हटले जाते. दुर्मिळ जातीचा हा साप आहे. जाडीने कमी, रंग फिक्कट तपकिरी आणि डोके व मानेचा रंग काळा तर शेपटीवर दोन काळ्या कडी असतात.

जमिनीखाली, गवत किंवा दगडांच्या खाली तो वास्तव्यात असतो. लांबी एक फुट दोन इंचापर्यंत त्याची अधिकतम लांबी आढळली आहे. हा साप अतिशय विषारी असून तो मानवी वस्तीत आढळत नाही. हा सापच दुर्मिळ असल्यामुळे त्याने दंश केल्याच्या घटना अभावानेच आढळतात. या सापाला डिवचले गेले असता शेपटी वर करून खवल्यांचा लाल रंग प्रदर्शित करतो. प्रजनन वाळक्‍या पालापाचोळ्यात किंवा दगडाच्या सपाटीत असते. मादी दोन ते सात इतकी अंडी घालते. सर्पोद्यानात वाळा साप घालल्याची नोंद आहे. संरक्षण कायद्यांतर्गंत त्याचा शेड्युल (2) मध्ये समावेश आहे.