संजय राऊत यांचा बुधवारी बेळगाव दौरा

बेळगाव : बेळगाव लोकसभा पोट निवडणुकीतील महाराष्ट्र एकिकरण समितीचे उमेदवार शुभम शेळके यांच्या प्रचारासाठी बुधवार (14) रोजी शिवसेना नेते खासदार संजय राऊत हे बेळगावला येणार आहेत. खासदार राऊत यांनी स्वत: ट्वीटरवरुन याबाबतची माहिती दिली आहे.

खासदार सुरेश अंगडी यांच्या निधनामुळे रिक्‍त झालेल्या जागेसाठी 17 एप्रिलला मतदान पार पडणार आहे. यावेळी पोट निवडणुकीसाठी समितीने शुभम शेळके या युवा कार्यकर्त्याला उमेदवारी दिली असून शेळके यांना सर्वच ठिकाणी चांगला प्रतिसाद मिळत आहे. समितीने प्रचारासाठी महाराष्ट्रातील नेते मंडळीने बेळगावात यावे यासाठी प्रयत्न सुरु केले होते. त्याला प्रतिसाद देत शिवसेनेची मुलुख मैदान म्हणुन ओळख असणाऱ्या संजय राऊत यांनी बेळगाव येऊन प्रचार करण्याची माहिती दिली आहे. 

हेही वाचा - आवड असली की सवडही मिळते; टाकाऊ वस्तूंपासुन तयार केला बगीचा

राऊत यांनी सीमावाशीयांवर होणाऱ्या अन्यायाबाबत नेहमीच आवाज उठविला असून सीमाप्रश्‍नाची सोडवणुक व्हावी यासाठी ते नेहमीच प्रयत्नशील असतात. त्यामुळे राऊत बेळगावला येणार असल्याची माहिती मिळताच मराठी भाषिकांचा उत्साह वाढला आहे. त्यांच्या येण्याने समितीला बळ मिळेल असे मतही सीमावाशीयांमधून व्यक्‍त होत आहे.

राऊत यांची सभा व रोड शो आयोजित करण्यात येणार असुन राऊत स्वत : प्रचारात सहभागी होणार आहेत. सीमाप्रश्‍नाचे समन्वयक मंत्री एकनाथ शिंदे यांनी व्हिडीओ प्रसारीत करुन मराठी भाषिकांना मतदान करण्याचे आवाहन केले आहे. शिंदे यांनी समितीच्या उमेदवाराला शिवसेनेचा पुर्ण पाठिंबा असून सीमाप्रश्‍नाचा समन्वयक मंत्री म्हणून आपण समितीला मतदान करण्याचे आवाहन करीत असल्याचे मत व्यक्‍त केले आहे.