रेडेघाटी परिसरात रस्त्यावर कोसळला शाडूचा भराव; पावनगड कडे जाणारा मार्ग बंद

आपटी - पन्हाळा व परिसरात होणाऱ्या सततच्या जोरदार पावसामुळे रेडेघाटी परिसरात शाडूचा भराव रस्त्यावर कोसळल्याने पन्हाळ्याहून पावनगडला जाणारा रस्ता बंद झाला आहे. आज दुपारी दोन अडीचच्या दरम्यान हा शाडूचा भराव कोसळला.ही घटना सायंकाळी फिरण्यासाठी गेलेल्या सुशांत पन्हाळकर यांनी संपर्क करून सदर माहिती दिली.

पावनगडवर येथील नागरिकांना पन्हाळा कोल्हापूर या ठिकाणी जाणे येणेसाठी हाच एकमेव रस्ता आहे. तर गेल्या वर्षी भूस्खलन होऊन पन्हाळ्याचा मुख्यरस्ता खचल्यानंतर याचा मार्गाचा पर्यायी रस्ता म्हणून वापर केला होता. हा परिसर वनविभागाच्या हद्दीमध्ये येत असल्यामुळे या रस्त्यावर डांबरीकरण करता येत नाही. पावनगडचे नागरिक चिखला मधून कसरत करत याच कच्च्या रस्त्याचा वापर करतात त्यामुळे पन्हाळ्यावरून पावनगड ला जाण्यासाठी लोकांना जीवाची बाजी लावून पावनगडला जाणाऱ्या मुख्यमार्गावर भराव कोसळल्यामुळे गडावरील नागरिकांमध्ये नाराजी व्यक्त होत आहे. तरी प्रशासनाने लवकरात लवकर हा भराव काढावा मार्ग खुला करून द्यावा असे पावनगड वरिल रहिवासी अंजुम मुजावर यांनी सांगितले. तर सायंकाळी नगरपरिषदेने तातडीने जेसीबीच्या साहाय्याने भराव हटविण्यास सुरवात केली.