शिराळा : आरक्षणासाठी इच्छुकांचे देव पाण्यात

शिराळा : नगरपंचायतीच्या सदस्यपदासाठी उद्या (ता. १३) आरक्षण जाहीर होणार असल्याने प्रभागनिहाय इच्छुकांनी धाकधूक वाढली आहे. उत्सुकता शिगेला पोहोचली आहे. नगरसेवकपदासाठी अनेकांनी गुडघ्याला बाशिंग बांधले आहे. आपल्याला पोषक असणारे आरक्षण पडावे यासाठी त्यांनी देव पाण्यात घातले आहेत.

गत पंचवार्षिकमध्ये पहिल्यांदा स्थापन झालेल्या नगरपंचायतीवर आपलाच झेंडा फडकण्यासाठी राष्ट्रवादीच्या माध्यमातून आमदार मानसिंगराव नाईक, भारतीय जनता पार्टीच्या माध्यमातून माजी आमदार शिवाजीराव नाईक व काँग्रेसच्या माध्यमातून सत्यजित देशमुख यांच्यात तिरंगी लढत दिली. यात आमदार मानसिंगराव नाईक यांनी ११ उमेदवारांच्या माध्यमातून बाजी मारली. शिवाजीराव नाईक यांनी सहा उमेदवारांच्या माध्यमातून नगरपंचायतीत विरोधी पक्ष म्हणून प्रवेश केला. सत्यजित देशमुख यांचा एकही उमेदवार निवडून न आल्याने सत्तेपासून दूर राहावे लागले. त्यापूर्वी बाजार समिती, पंचायत समिती, जिल्हा परिषद अशा निवडणुकीत मानसिंगराव नाईक व सत्यजित देशमुख यांनी आघाडी करून शिवाजीराव नाईक यांना आमदार असताना सत्तेपासून दूर ठेवले. ऐन नगरपंचायत निवडणुकीत आघाडीत बिघाडी होऊन तिरंगी लढत झाली होती.सत्यजित देशमुख यांनी काँग्रेसला रामराम ठोकून भाजपमध्ये प्रवेश केला आहे. शिवाजीराव नाईक यांनी भाजपातून राष्ट्रवादीत आल्याने आत्ताचे चित्र बदलले आहे.

आत्ताची नगरपंचायत निवडणूक ही भाजप विरुद्ध राष्ट्रवादी अशी होणार. त्यामुळे मानसिंगराव नाईक व शिवाजीराव नाईक यांच्या विरोधात सत्यजित देशमुख, रणजितसिंह नाईक व सम्राट महाडिक यांना टक्कर द्यावी लागणार आहे. विधानसभा निवडणुकीत मानसिंगराव नाईक यांनी नाईक-देशमुख यांना टक्कर देत बाजी मारली होती. सध्या चित्र बदलले असून, तालुक्यात नाईक विरुद्ध देशमुख असे चित्र आहे. या निवडणुकीची पूर्व तयारी म्हणून आमदार नाईक यांनी चार वर्षांत चार महिलांना नगराध्यक्षा होण्याची संधी दिली आहे. पहिल्यांदा सुनंदा सोनटक्के, अर्चना शेटे, सुनीता निकम व प्रतिभा पवार यांना संधी दिली. त्याच बरोबर उपनगराध्यक्षपदी किर्तीकुमार पाटील व सध्या विजय दळवी यांना संधी दिली. विविध सभापतीपदी संधी प्रत्येकाला देऊन राजकीय समतोल कायम राखण्याचा प्रयत्न केला आहे.

शिवाजीराव नाईक यांनी राष्ट्रवादी प्रवेश केल्याने शिराळा शहरात राष्ट्रवादीचे पारडे जड झाले आहे. त्यांना सत्यजित देशमुख, रणजित नाईक व सम्राट महाडिक यांना कडवी टक्कर द्यावी लागणार आहे. शिवाय काँग्रेस, शिवसेना, वंचित बहुजन आघाडी, मनसे व इतर पक्ष यांची संयुक्त भूमिका महत्त्वाची ठरणार आहे.