मायक्रो फायनान्स कंपनीची फसवणूक! कर्मचाऱ्यावर गुन्हा दाखल

मोहोळ (सोलापूर) : मदुरा मायक्रो फायनान्स कंपनीच्या माध्यमातून बचत गटाच्या महिला सभासदांनी घेतलेल्या कर्जाच्या परतफेडीच्या हप्त्याची रक्कम फायनान्स कंपनीत न भरता 48 सभासदांची एकूण 1 लाख 75 हजार 411 रुपये इतकी रक्कम स्वतःच्या फायद्याकरिता वापरून फायनान्स कंपनीची फसवणूक (Fraud) केली. तसेच पैशाचा अपहार केल्या प्रकरणी उत्तर सोलापूर तालुक्‍यातील अकोलेकाटी येथील किरण गौतम सर्वगोड याच्यावर मोहोळ पोलिस ठाण्यात (Mohol Police Station) गुन्हा (Crime) दाखल झाला आहे.

ही घटना 24 ऑक्‍टोबर रोजी घडली. याबाबत मोहोळ पोलिसांनी दिलेल्या माहितीनुसार, मदुरा मायक्रो फायनान्स या कंपनीच्या माध्यमातून मोहोळ शाखेमध्ये फायनान्स रिलेशनशिप असोसिएट या पदावर किरण गौतम सर्वगोड हा काम करत होता. या माध्यमातून महिला बचत गटांना आर्थिक सुविधा पुरवण्याचे काम करण्यात येते. कंपनीच्या नियमानुसार कर्जपुरवठा करणे व कर्ज वाटप करणे, दिलेल्या कर्जाचे हप्ते संकलन करणे व नवीन सभासद तयार करणे अशी कामे सर्वगोड करत होता. दरम्यान, 1 ऑक्‍टोबर रोजी तो कामावर होता. दुसऱ्या दिवशी सुट्टी असल्याने काम बंद होते. पुन्हा दोन दिवस कामावर तो न आल्याने शाखाधिकारी सूरजितसिंग बालाजी ठाकूर यांनी त्याला कामावर न येण्याबाबत विचारले असता, त्याने, माझी पत्नी आजारी असल्याने मी मुंबईला आलो असल्याचे सांगितले. पुन्हा तो कामावर लवकर हजर होत नसल्याचे लक्षात आल्यानंतर शाखाधिकारी ठाकूर यांनी त्याच्याकडे असलेल्या गावांबाबत माहिती घेऊन व्यवहाराची नोंद तपासली असता, बचत गटाच्या नोंदीची व कर्जाची परतफेडीच्या नोंदीची तफावत आढळली.

यामध्ये अखत्यार मुलाणी (रा. पडसाळी) यांचे 50 हजार रुपये, गुरुदेव बचत गटातील एका महिलेचे एक हजार 730 व सिद्धिविनायक बचत गटातील एका महिलेचे 5 हजार 500 रुपये यासह 45 सभासदांच्या कर्जाच्या परतफेडीच्या हप्त्याच्या रकमा सभासदांकडून घेऊन फायनान्स कंपनीत न भरता सदरची रक्कम स्वतःच्या फायद्याकरिता वापरून कर्जदार सभासदांची व फायनान्स कंपनीची एकूण 1 लाख 75 हजार 411 रुपयांची फसवणूक केली व रकमेचा अपहार केल्याप्रकरणी किरण सर्वगोड याच्यावर शाखाधिकारी ठाकूर यांनी मोहोळ पोलिस ठाण्यात गुन्हा दाखल केला आहे. अधिक तपास पोलिस हेडकॉन्स्टेबल माने ही करीत आहेत.