शिवबाबा ट्रॅव्हल्समधील १४ प्रवाशांच्या बॅगा लंपास! शिर्डी ते सोलापूर प्रवासात झाला प्रकार; सोलापूर पोलिसांनी दोघांना घेतले ताब्यात

सोलापूर : शिर्डी ते सोलापूर प्रवासा दरम्यान शिवबाबा ट्रॅव्हल्स बसमधील (एमएच १३, डीक्यू ५०७३) १४ प्रवाशांच्या बॅगा व त्यातील कपडे, रोकड, दागिने असा एकूण ४३ हजार रुपयांचा मुद्देमाल चोरीला गेला आहे. या प्रकरणी नागालक्ष्मी लक्ष्मीनारायण दंतू (वय ४०, रा. मक्केन वारगुडम, आंध्र प्रदेश) यांनी फौजदार चावडी पोलिसांत फिर्याद दिली आहे. शुक्रवारी (ता. ३०) मध्यरात्री दोन ते सकाळी सात या वेळेत हा प्रकार झाल्याचे फिर्यादीत नमूद आहे.

शिवबाबा ट्रॅव्हल्सने शुक्रवारी फिर्यादी नागालक्ष्मी दंतू यांच्या दोन बॅगा, एक हँडबॅग व त्यातील जुनी कपडे आणि ३० हजार रुपयांची रोकड चोरीला गेली आहे. दुसऱ्या प्रवासी नागमणी यांची एक बॅग, त्यातील कपडे व सहा हजार रुपयांची रोकड, लक्ष्मी प्रसन्ना यांच्या दोन बॅगा व पाच हजारांची रोकड चोरीला गेली आहे. याशिवाय प्रवासी जी. मणी, एम. कृष्णराव, श्रीनिवास नारायण, यू. मुर्नीदर राव, नरसम्मा, रामण्णा, कृष्णवेण्णी, व्यंकम्मा, के. धनलक्ष्मी, के. शासम्मा व एन. नागेश्वर राव यांच्या बॅगा व त्यातील कपडे चोरीला गेल्याचे फिर्यादीत नमूद आहे. पोलिसांनी ट्रॅव्हल्स सोलापुरात आल्यावर प्रवाशांच्या तक्रारीनंतर सहायक पोलिस आयुक्त प्रताप पोमण, वरिष्ठ पोलिस निरीक्षक अरविंद माने, पोलिस निरीक्षक तानाजी दराडे, सहायक पोलिस निरीक्षक शंकर धायगुडे, श्री. पाटील यांनी भेट देऊन पाहणी केली. तपास पोलिस हवालदार परिट करीत आहेत.

बॅगा लंपास कोठे झाल्या? शोध सुरू

शिवबाबा ही ट्रॅव्हल्स बस शिर्डीवरून निघाल्यापासून सोलापुरात येईपर्यंत चार ते पाच ठिकाणी थांबली होती. त्यातील १४ प्रवाशांपैकी चार प्रवाशांच्या प्रत्येकी दोन तर नऊ प्रवाशांच्या प्रत्येकी एक आणि फिर्यादीच्या तीन बॅगा अशा एकूण २० बॅगा चोरीला गेल्या आहेत. ही चोरी नेमकी कोठे झाली हे चालक, वाहकांना देखील माहिती नाही. प्रवाशांनीही रात्रीचा प्रवास असल्याने वाटेत बॅगा पाहिल्या नाहीत. त्यामुळे पोलिस आता हा प्रकार नेमका कोठे झाला, याचा शोध घेत आहेत.