लॉकडाउनमध्ये गैरहजर राहिल्यास सेवेतून बडतर्फ! कोणी दिला इशारा? वाचा 

सोलापूर : महापालिका हद्दीत 16 जुलैच्या रात्री 12 वाजल्यापासून कडक संचारबंदी लागू होणार आहे. या पार्श्‍वभूमीवर महापालिकेने नियुक्‍त केलेल्या अधिकारी व कर्मचाऱ्यांनी कामावर हजर राहणे बंधनकारक आहे. गैरहजर राहणाऱ्यांवर शिस्तभंगाची कारवाई करून गुन्हा दाखल केला जाणार आहे. तर आवश्‍यकतेनुसार बडतर्फही करण्याचा इशारा महापालिका आयुक्‍त पी. शिवशंकर यांनी दिला आहे. 

हेही वाचा : एकाच रात्री चोरट्यांनी फोडली जिल्हा बॅंक शाखा अन्‌ मेडिकल दुकान 

लॉकडाउनची कडक अंमलबजावणी व्हावी, यासाठी पोलिस प्रशासनास सहकार्य करण्याच्या हेतूने महापालिकेतर्फे अधिकारी, शिक्षक व कर्मचाऱ्यांची नियुक्‍ती करण्यात आली आहे. त्यामध्ये 400 लॉकडाउन असिस्टंट (वर्ग 3) उपलब्ध करून देण्यात येणार आहेत. तसेच लॉकडाउन निरीक्षक (वर्ग 1), लॉकडाउन क्षेत्रीय अधिकारी (वर्ग 2) आणि लॉकडाउन पर्यवेक्षक (वर्ग 2) प्रत्येकी 26 जणांची नियुक्‍ती केली आहे. या सर्वांना नियुक्‍तीचे आदेश त्यांच्या व्हॉट्‌सऍप, ई-मेल व मेसेजद्वारे पाठवण्यात आले आहेत. 

हेही वाचा : खळबळजनक! सोशल मीडियावर बदनामीकारक मजकूर व्हायरल; "या' तहसीलदारांनी दिली "या' सामाजिक कार्यकर्त्याविरुद्ध फिर्याद 

या सर्वांना महापालिकेतील यशवंतराव सभागृह, हुतात्मा स्मृती मंदिर आणि महापालिका परिसरातील आवारामध्ये उपस्थित राहावे, असे सांगण्यात आले आहे. आदेशाचे उल्लंघन करणाऱ्यांविरुद्ध शिस्तभंगाची कारवाई करून गुन्हे दाखल केले जाणार आहेत. तसेच आवश्‍यकतेनुसार सेवेतून बडतर्फही करण्याचा इशारा आयुक्‍तांनी दिला आहे. 

संपादन : श्रीनिवास दुध्याल