पंढरपूर (सोलापूर) : पंढरपूर शहर व तालुक्‍यात सध्या तरी लॉकडाउनबाबत कोणताही निर्णय घेण्यात आला नाही. पुढच्या काही दिवसांत प्रशासकीय अधिकाऱ्यांशी चर्चा करून त्यानंतर काय तो निर्णय घेतला जाईल. पंढरपुरातील करोनाबाधित रुग्णांवर टास्क फोर्स समितीच्या सल्ल्यानुसार उपचार केले जातील, अशी माहिती जिल्हाधिकारी मिलिंद शंभरकर यांनी येथे पत्रकारांशी बोलताना दिली.
पंढरपूर शहर व तालुक्‍यात कोरोनाबाधित रुग्णांची संख्या वाढू लागली आहे. यावर कोणते प्रतिबंधात्मक उपाय करता येतील, याविषयी चर्चा करण्यासाठी जिल्हाधिकारी मिलिंद शंभरकर यांच्या प्रमुख उपस्थितीत सर्व प्रमुख प्रशासकीय व वैद्यकीय अधिकाऱ्यांची बैठक येथील शासकीय विश्रामगृहावर झाली. बैठकीमध्ये कोरोना संसर्ग कमी करण्यासंबंधित चर्चा झाली. या वेळी जिल्हाधिकारी श्री. शंभरकर यांनी अधिकाऱ्यांना काही महत्त्वाच्या सूचनाही दिल्या. बैठकीपूर्वी त्यांनी शहरातील अधिग्रहित करण्यात आलेल्या खासगी हॉस्पिटलची पाहणी करून संबंधित हॉस्पिटलच्या डॉक्‍टरांशी चर्चा केली.
बैठकीनंतर जिल्हाधिकारी श्री. शंभरकर यांनी पत्रकारांशी बोलताना सांगितले, की पंढरपूर शहर व तालुक्‍यातील कोरोना रुग्णांवर पंढरपुरातच उपचार करण्याची सोय उपलब्ध करून दिली जाणार आहे. यासाठी काही खासगी हॉस्पिटल अधिग्रहण केली आहेत. त्या ठिकाणी हे उपचार सुरू केले जाणार आहेत. इतर आजारांच्या रुग्णांसाठी देखील स्वतंत्रपणे उपचाराची सोय केली जाणार आहे. वाढत्या कोरोना रुग्णांची संख्या कमी करण्यासाठी पंढरपुरात टास्क फोर्स (वैद्यकीय तज्ज्ञ समिती)ची मदत घेतली जाणार आहे. या समिती तज्ज्ञांच्या सल्ल्यानुसार कोरोनाबाधित रुग्णांवर उपचार केले जाणार आहेत. यासाठी सोलापूर येथील शासकीय वैद्यकीय महाविद्यालयाचे डिन डॉ. ठाकूर यांचा विशेष सल्ला आणि मार्गदर्शन घेतले जाणार आहे. याबाबत डॉ. ठाकूर यांनी आज काही डॉक्‍टरांशी चर्चा करून त्यांना उपचारासंबंधी सल्ला आणि सूचनाही केल्या. पंढरपूर शहर व तालुक्‍यात लॉकडाउन जाहीर करण्याबाबत आज तरी कोणताही निर्णय घेतलेला नाही. लॉकडाउनबाबत स्थानिक प्रशाकीय अधिकाऱ्यांशी चर्चा करूनच योग्य तो निर्णय घेतला जाईल. पुढच्या काही दिवसांत यावर चर्चा केली जाणार असल्याचेही जिल्हाधिकारी श्री. शंभरकर यांनी सांगितले.
बैठकीला आमदार भारत भालके, जिल्हा पोलिस अधीक्षक मनोज पाटील, प्रांताधिकारी सचिन ढोले, उपविभागीय पोलिस अधिकारी डॉ. सागर कवडे, डॉ. जयश्री ढवळे, तालुका वैद्यकीय अधिकारी एकनाथ बोधले, गटविकास अधिकारी रविकिरण घोडके आदींसह प्रमुख अधिकारी उपस्थित होते.
संपादन : श्रीनिवास दुध्याल
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.