क्राईम : व्याज मागितल्याने एकावर सावकारी गुन्हा 

सांगोला (सोलापूर) : शेती व घर खर्चास घेतलेली उसनवार रक्कम परत करूनही व्याज व दंडाच्या रकमेपोटी एक लाख रुपये दे म्हणून सातत्याने तगादा लावून एकास शिवीगाळ व दमदाटी करून मारहाण केल्याची घटना महूद (ता. सांगोला) येथे घडली. याप्रकरणी सांगोला पोलिस ठाण्यात सावकारीचा गुन्हा दाखल झाला आहे.

व्याजदराने घेतले 25 हजार 
राहुल रामचंद्र पवार (रा. गायगव्हाण, ता. सांगोला) याने शंकर शिवाजी पाटील (रा. पवारवाडी, महूद, ता. सांगोला) यांच्याकडून 40 टक्के व्याजदराने 25 हजार रुपये घेतले होते. या रकमेपोटी प्रत्येक आठवड्याला शंकर पाटील यांना 2500 रुपये व्याज म्हणून पोहोच केले होते. फिर्यादी राहुल पवार यांनी त्यांच्याकडे असणाऱ्या 10 शेळ्या विकून आलेल्या रकमेतील 25 हजार रुपये समाधान जुगदार यांच्या समक्ष शंकर पाटील यांना परत केले होते. घेतलेली पूर्ण रक्कम व व्याज शंकर पाटील यांना देऊनही व्याज व दंडाची रक्कम म्हणून मला अणखी एक लाख रुपये दे म्हणून शंकर पाटील यांनी वारंवार मोबाईलद्वारे राहुल पवार यास शिवीगाळ व दमदाटी केली होती. यानुसार सांगोला पोलिस ठाण्यात सावकारकीचा गुन्हा दाखल करण्यात आला. 

हेही वाचा - बायकोला पाजले विष;मिळाली दहा वर्षांची सक्तमजुरी

अत्याचारप्रकरणी एकास अटक 
बार्शी : आई - वडील मोलमजुरी करण्यास बाहेर गेले असताना तरुणाने बळजबरीने मारहाण करून शालेय अल्पवयीन विद्यार्थिनीवर अत्याचार केला. बार्शी शहर पोलिसांत बाललैंगिक अत्याचार कायद्यानुसार गुन्हा दाखल झाला. मोहसीन पठाण गुन्हा दाखल झालेल्याचे नाव आहे. पीडित मुलीच्या पालकांनी फिर्याद दाखल केली. ही घटना आज घडली. 

हेही वाचा - महिला दिन विशेष : ती देतेय आरोग्यदायी जिवनाचे धडे 

दुचाकी अपघातात एकाचा मृत्यू 
मंगळवेढा : दुचाकी वेगाने चालवून एकाच्या मृत्यूस कारणीभूत ठरल्याप्रकरणी एका विरोधात गुन्हा दाखल करण्यात आला. ही घटना मंगळवेढा ते कारखाना रस्त्यावर अवताडे सूत मिल वळणावर घडली. रूपेश शिंदे याने त्याच्या ताब्यातील स्कुटी दुचाकी वेगाने चालवून तानाजी सिद्धेश्‍वर नागणे (रा. चांभार गल्ली) चालवित असलेल्या ड्रीम योगा दुचाकीला धडक दिली. यात तानाजी नागणे गंभीर जखमी झाल्याने मृत्यू झाला. त्याच्या मृत्यूस कारणीभूत ठरलेल्याने रूपेश शिंदे यांच्यावर गुन्हा दाखल करण्यात आला. 

मंगळवेढ्यात चौघांकडून फिर्यादस मारहाण 
मंगळवेढा : पंढरपूर न्यायालयात सुरू असलेल्या खटल्यांमध्ये वेळेवर सक्‍सेस का हजर राहत नाही असे विचारत तुझ्यामुळे केस लांब पडत आहे म्हणून चौघांनी मारहाण व शिवीगाळ करून मारहाण केल्याची फिर्याद पांडुरंग विठोबा लवटे (रा. खुपसंगी) यांनी दिली. ही घटना काल खुपसंगी ते आंधळगाव रोडवरील लवटेवस्ती येथे घडली असून यामध्ये दिनेश सिताराम लेंगरे, बिरा अण्णा लवटे, कुशाबा नारायण पडवळे, अंकुश उर्फ तुकाराम राजाराम पडोळे (सर्वजण रा. खुपसंगी) येथील असून त्यांनी फिर्यादीस पंढरपूर जिल्हा न्यायालयातील खटल्यात हजर का राहत नाही, केवळ तुझ्यामुळे केस लांबणीवर पडत आहे आणि नातेवाईकांच्या बाजूने साक्ष देण्यासाठी अंकुश पडवळे यांनी हातातील लोखंडी रॉडच्या साह्याने हातावर, पाठीवर मारहाण करून गळ्यातील सोन्याची चैन काढून घेतली. तीन संशयित आरोपींनी फिर्यादीस लाथाबुक्‍क्‍यांनी मारहाण केली. "ज्याप्रमाणे तुझ्या वडीलास मारले, त्याप्रमाणे तुलाही मारू,'अशी धमकी दिल्याचे फिर्यादीत नमूद केले आहे.