आता काय करावे ! वस्तूच्या नावाखाली अंमली पदार्थांचा शोध 

सोलापूर : कोरोना या विषाणूला हद्दपार करण्याच्या हेतूने शहरात लागू केलेल्या संचारबंदीच्या आदेशाचे उल्लंघन करणाऱ्या तब्बल सहा हजार 841 जणांविरुध्द मागील पाच दिवसांत गुन्हे दाखल झाले आहेत. शहरातील सात पोलिस ठाण्याच्या हद्दीत 21 ठिकाणी नाकाबंदी करण्यात आली असून दोन दिवसांत पाचशे वाहने जप्त केल्याची माहिती पोलिस आयुक्‍तालयाकडून देण्यात आली. 

हेही नक्‍की वाचा : अबब...! कारागृहाची क्षमता 141 अन्‌ आहेत 428 कैदी 

शहरातील फौजदार चावडी, जेलरोड, सदर बझार, विजापूर नाका, सलगर वस्ती, एमआयडीसी व जोडभावी पोलिस ठाण्याअंतर्गत प्रत्येकी तीन ठिकाणी नाकाबंदी करण्यात आली आहे. सकाळी 6 ते रात्री 11 वाजेपर्यंत त्या ठिकाणी वाहतूक पोलिसांसह अन्य पोलिस अधिकारी व कर्मचाऱ्यांची नियुक्‍ती करण्यात आली आहे. जिल्हाधिकारी मिलिंद शंभरकर यांच्या आदेशानुसार शहर-जिल्ह्यात 14 एप्रिलपर्यंत संचारबंदी लागू करण्यात आली असून कोरोनाबद्दल अफवा पसरविणाऱ्यांवर कडक कारवाई केली जात आहे. तर दुसरीकडे नागरिकांनी विनाकारण घराबाहेर पडू नये, अशा सूचनाही करण्यात आल्या आहेत. मात्र, औषधे अथवा जीवनावश्‍यक वस्तू खरेदी करण्याचा बहाणा करुन बहूतांश वाहनचालक दारु, मावा अशा आमंली पदार्थाचा शोध घेत असल्याचेही पोलिस चौकशीत समोर आले. त्यामुळे अशा वाहनचालकांविरुध्द कडक कारवाई केली जात आहे. 

हेही नक्‍की वाचा : सोलापूर ते नेलमंगला रो- रो सेवेला मान्यता 

विनाकारण घराबाहेर पडल्यास कारवाई होणारच 
शहरात 14 एप्रिलपर्यंत संचारबंदीचे आदेश लागू आहेत. जीवनावश्‍यक वस्तू खरेदीच्या नावाखाली विनाकारण घराबाहेर पडणाऱ्या वाहनचालकांवर कारवाई केली जात आहे. वाहनचालकाने सांगितलेले कारण रास्त वाटले तरच त्याला सोडले जाते, अन्यथा वाहन जप्त करुन गुन्हा दाखल करण्याचे आदेश पोलिस अधिकारी व कर्मचाऱ्यांना दिले आहेत. नागरिकांनी कोरोनाला हद्दपार करण्यासाठी जिल्हाधिकाऱ्यांच्या आदेशाचे पालन करावे. 
- अंकूश शिंदे, पोलिस आयुक्‍त, सोलापूर 

हेही नक्‍की वाचा : मोठी बातमी ! मालवाहतूक वाहनांना स्वतंत्र परवान्याची गरज नाही 

ठळक बाबी... 

• 2 एप्रिलला 352 जर 3 (शुक्रवारी) एप्रिलला 148 वाहनांवर पोलिसांची कारवाई 
• 30 मार्च ते 3 एप्रिलपर्यंत संचारबंदी उल्लंघन प्रकरणी सहा हजार 841 जणांवर गुन्हे 
• औषधे अथवा जिवनावश्‍यक वस्तू खरेदीच्या नावाखाली विनाकारण घराबाहेर पडणारे वाहनचालक रडारवर 
• शहरात प्रत्येक पोलिस ठाण्याच्या हद्दीत प्रत्येकी तीन ठिकाणी नाकाबंदी 
• गुन्हे दाखल झालेल्या वाहनचालकांचे परवाने रद्दचा पाठविला जाणार आरटीओकडे प्रस्ताव