'...तर भारत विकसित व्हायला वेळ लागणार नाही' - डॉ. निरगुडकर; भारत व्हिजन सेंटरच्या कार्यक्रमात उद्योजकांशी संवाद

पुढील पाच वर्षात विकास दर व नाविन्यतेची गती कायम ठेवली तर विकसित भारत व्हायला आणि ते आपण प्रत्यक्ष पाहायला वेळ लागणार नाही, असा विश्वास ज्येष्ठ पत्रकार डॉ. उदय निरगुडकर यांनी व्यक्त केला. शुक्रवारी (ता. ५) यंत्रमाग धारक संघाच्या कार्यालयात भारत व्हीजन सेंटरच्या माध्यमातून डॉ. निरगुडकर यांनी सोलापुरातील मान्यवर उद्योजक, व्यापारी, कारखानदार तसेच बँका, पतसंस्थांचे पदाधिकारी, संचालक आणि वरिष्ठ अधिकाऱ्यांशी संवाद साधला. त्यांच्याशी आर्थिक प्रश्नही चर्चा केली.

आताचा भारत बदलला आहे. २०४७ मध्ये हाच भारत अधिक सामर्थ्यवान राहील, असा विश्वास व्यक्त करून डॉ. निरगुडकर म्हणाले, नीती, गती, दिशा हे केंद्रबिंदू मानून विद्यमान केंद्र सरकारने देशवासियांचा विश्वास संपादन केला आहे. एक आयटी उद्योग सोलापुरात आला तर येथील चित्र बदलू शकते. यासाठी प्रयत्न अपुरे ठरले असावेत. पारंपरिक उद्योगाला नाविन्यतेची जोड देणे गरजेचे आणि त्यासाठी संघटितपणे प्रयत्न व्हायला हवेत. तसेच प्रशासनात क्षमतावान अधिकारीही हवेत, याकडे त्यांनी लक्ष वेधले.

या कार्यक्रमास उद्योजक सिद्धेश्वर गड्डम, संघाचे खजिनदार अंबादास बिंगी, श्रीनिवास दायमा, भारत व्हीजन सेंटरचे प्रमुख विजयकुमार पिसे, सहप्रमुख राहुल पावले, महाराष्ट्र नॉलेज सेंटरचे स्वप्नील चौधरी, अभिजित पाटील उपस्थित होते.

सोलापूर जनता सहकारी बँकेत सहकार क्षेत्रातील बँकर्स, अर्थतज्ज्ञ, अधिकारी व संचालकांशी त्यांनी संवाद साधला. बँकेचे अध्यक्ष सुनील पेंडसे यांनी त्यांचे स्वागत केले. यावेळी संचालक प्रा. गजानन धरणे, चंद्रिका चौहान, पतसंस्था फेडरेशनचे दिलीप पतंगे, श्रीशैल बनशेट्टी, रोहिणी तडवळकर, राम शर्मा, मुख्य कार्यकारी अधिकारी मुकुंद कुलकर्णी उपस्थित होते.

तर डॉ. निरगुडकर यांनी उद्योगवर्धिनीला भेट दिली. तेथे महिला उद्योजिका, कार्यकर्त्यांशी संवाद साधला. तर पत्रकार, डिजिटल मीडियाशी संवाद साधताना विकास पत्रकारितेची व्याख्या अधिक अधोरेखित केली. याप्रसंगी पी. आर. कुलकर्णी, ऋषिकेश आकतनाळ, अशोक आडम, संजय पवार उपस्थित होते.