माजी मंत्र्यांनी नातेवाइकाचा विवाह ढकलला पुढे ! सोलापुरात एप्रिलमध्ये एकही विवाह नाही

सोलापूर : कोरोनाचा वाढता प्रादुर्भाव रोखण्यासाठी विवाहावरील निर्बंध कडक करण्यात आले आहेत. विवाह समारंभासाठी आता 50 नव्हे तर 25 जणांचीच उपस्थिती असणे बंधनकारक आहे. वधू-वरांकडील मंडळीनीदेखील कोरोनाची धास्ती घेत विवाह समारंभ पुढे ढकलले असून 1 ते 18 एप्रिल या काळात शहरात एकही विवाह झाला नाही.

विवाहासाठी जेवढ्या लोकांची उपस्थिती बंधनकारक आहे, तेवढ्याच लोकांच्या उपस्थितीत विवाह समारंभ न घेणाऱ्या मंगल कार्यालयांवरच पोलिसांनी कारवाई सुरू केली आहे. आतापर्यंत पाच मंगल कार्यालये सील केली असून त्यातील तीन कार्यालयांना अजूनही कुलूपच आहे. दरम्यान, ज्या मंगल कार्यालयात विवाह होणार आहे, तेथील सेवा देणाऱ्या प्रत्येक कर्मचाऱ्यांनी कोरोना टेस्ट करणे बंधनकारक आहे. मागील 48 तासांतील टेस्ट केल्याचे प्रमाणपत्र त्यांच्याकडे असणे अनिवार्य असल्याचेही पोलिस उपायुक्‍त डॉ. वैशाली कडूकर यांनी स्पष्ट केले आहे.

दुसरीकडे, वधू-वरांकडील मंडळींनी दोन्हीकडील केवळ 25 लोकच उपस्थित राहतील, याची दक्षता घ्यावी. त्यांची यादी पोलिस आयुक्‍तालयाला देऊन विवाहासाठी परवानगी घ्यावी, असेही त्यांनी यावेळी सांगितले. कोरोना वाढत असल्याने शहरात मागील 18 दिवसांत एकही विवाह झालेला नाही, असेही त्यांनी आवर्जून सांगितले.

माजी मंत्र्यांनी नातेवाइकाचा विवाह पुढे ढकलला

उस्मानाबादचे माजी मंत्री मधुकरराव चव्हाण यांच्या नातेवाइकाचा एप्रिल महिन्यात सोलापुरातील हेरिटेज गार्डन येथे विवाह नियोजित होता. त्यांनी पोलिस आयुक्‍तालयाकडे त्याची परवानगी मागितली. त्या वेळी विवाहासाठी केवळ 25 लोकांनाच परवानगी मिळेल, असे वरिष्ठ अधिकाऱ्यांनी त्यांना सांगितले. त्यांनी वेगवेगळ्या हॉलमध्ये काही लोक बसवता येतील का, याची विचारणा केली. मात्र, पोलिसांनी त्याला नकार दिला. कोरोनाची परिस्थिती पाहून त्यांनी नातेवाइकाचा विवाह पुढे ढकलला, अशी माहिती पोलिस सूत्रांनी दिली.

22 एप्रिलला दोन विवाह

शहरातील दोन मंगल कार्यालयांत 22 एप्रिल रोजी विवाह होणार आहेत. त्यासाठी पोलिस आयुक्‍तालयाकडे त्यांनी परवानगी मागितली असून त्यांनी उपस्थित राहणाऱ्या 25 लोकांची यादीदेखील दिली आहे. त्यानुसार त्यांना कोरोनासंबंधीच्या सर्व नियमांचे पालन करण्याच्या अटीवर परवानगी देण्यात आली आहे. तर ज्या मंगल कार्यालयात हे विवाह होतील, त्या मंगल कार्यालयात सेवा देणाऱ्या प्रत्येक कर्मचाऱ्याने कोरोना टेस्ट करणे बंधनकारक आहे, असे पोलिस उपायुक्‍त डॉ. वैशाली कडूकर यांनी स्पष्ट केले आहे.