मोहोळ पंढरपूर पालखी मार्गावर अपघात पाच जणांचा मृत्यू अन्य पाच जण जखमी

Mohol News : भरधाव निघालेली इको कार रस्त्याच्या कडेला असलेल्या सिमेंट पुलाला धडकून झालेल्या अपघातात पाच जणांचा मृत्यू झाला. तर अन्य पाच जण जखमी झाले. हा अपघात मोहोळ- पंढरपूर पालखी मार्गावरील पोखरापूर शिवारात मंगळवार ता 7 रोजी पहाटे अडीच वाजता झाला.

सोमनाथ शिवाजी डवरी वय 40, रेणुका सुरेश कासार वय 45, नवनाथ अनिकेत जाधव वय 7 हे गंभीर जखमी झाल्याने त्यांचा जागीच मृत्यू झाला. तर दिलीप हरिनाथ कोष्टी वय 60, सीता दिलीप कोष्टी वय 55, हे गंभीर जखमी झाल्याने त्यांना पुढील उपचारासाठी सोलापूर येथील रुग्णालयात दाखल केले असता त्यांचा उपचार सुरू असताना मृत्यू झाला.

श्रावणी सुरेश डवरी वय 16, महेश दिलीप कोष्टी वय 24, निकिता महेश कोष्टी वय 19, आकाश सुरेश जोगी वय 21 रा वडाळा, अश्विनी अनिकेत जाधव वय 25 रा कोर्टी अशी जखमींची नावे आहेत. जखमींना उपचारासाठी सोलापूर येथील सिव्हिल रुग्णालयात दाखल केले आहे.

मोहोळ पोलिसां कडून मिळालेल्या माहिती नुसार, इको कार क्रमांक एम एच 13 इसी 2819 ही कोल्हापूर हून पंढरपूर मार्गे सोलापूरच्या दिशेने भरधाव निघाली होती. ती पोखरापुर शिवारात येताच तिच्यावरील चालकाचे नियंत्रण सुटल्याने ती एका सिमेंट पुलाला धडकली.

त्यात वरील पाच जण मृत पावले, तर अन्य पाच जण जखमी झाले. हा अपघात होताच परिसरातील नागरिकांनी कार मध्ये अडकलेल्या जखमींना बाहेर काढण्यास मदत केली. या अपघाताची फिर्याद सुरेश शिवाजी डवरी वय 41 रा वडाळा तालुका उत्तर सोलापूर याने मोहोळ पोलिसात दिली असून इको कारचा चालक अनिकेत अंकुश जाधव वय 29 रा कोर्टी याचे विरोधात गुन्हा दाखल झाला आहे. या घटनेचा तपास पोलीस उपनिरीक्षक ज्योतिबा पवार करीत आहेत.