अक्कलकोट शहर व ग्रामीण भागात जोरदार पाऊस

अक्कलकोट (सोलापूर) : हवामान खात्याच्या 20 सप्टेंबर ते 24 सप्टेंबर दरम्यान जोरदार पाऊस पडेल याचा हवामान अंदाज 20 व 21 तारखेस थोडासा फोल ठरला पण 22 तारखेस सायंकाळी विजेच्या गडगडाटासह जोरदार पाऊस झाल्याने बळीराजा सुखावला आहे.अक्कलकोट तालुक्‍यातील उत्तर भागात पूर्ण पावसाळ्यात कमी अधिक पाऊस सतत होत गेला परिणामी कुरनुर धरण व पाझर व साठवण तलाव तसेच ओढे व नाले खळाळून वाहिल्याचे दिसून आले.तालुक्‍यातील 70 टक्के भाग म्हणजे 9 पैकी 6 मंडळे अधिक पावसासाठी तहानलेली दिसली.नागरिक विशेषतः शेतकरी वर्ग एक जोरदार पाऊस होण्याची वाट पाहत होता.समर्थ नगरच्या पुढे पाऊस सरकत नव्हता पण आज दोड्याळ,जेऊर,करजगी,अक्कलकोट स्टेशन,नाविंदगी,नागणसुर,गौडगाव बनजगोळ ,कडबगाव,सलगर आदी भागात सायंकाळी साडे चार ते सहा वाजेपर्यंत कमी अधिक प्रमाणात पाऊस झाला.

अनेक ठिकाणी पाणीच पाणी झालेले पहावयास मिळाले. खरीप हंगाम अर्धवट पावसाने 75 टक्के वाया गेलेले होते.जेऊर परिसरातील विहीर पाणी पातळी कमी झालेली आहे तसेच रब्बी पेरणीसाठी पावसाची नितांत गरज होती ती आजच्या पावसाने पूर्ण झाली आहे.आता आणखी दोन दिवस पाऊस होण्याचा हवामान खात्याचा अंदाज आहे नेमके याकडे शेतकरी बांधवांचे लक्ष लागून राहिले आहे.

आजपर्यंत झालेला पाऊस बाहेरचे आकडे आजचे तर कंसातील आकडे आजपर्यंत झालेल्या विविध मंडळातील पावसाचे आहेत

• अक्कलकोट : 03 (342) चपळगाव : 00 (223)

• वागदरी : 00 (292)

• किणी : 00 (163)

• मैंदर्गी : 04 (138)

• दुधनी : 08 (203)

• जेऊर : 04 (173)

• करजगी : 00 (180)

• तडवळ : 00 (165)

सरासरी पाऊस एकूण अक्कलकोट तालुका :

• आजचा पाऊस : 02.11 मिमी

• एकूण पाऊस : 208.77 मिमी