होम क्वारंटाईन केलेल्या व्यक्ती इतत्र फिरल्याप्रकरणी करमाळ्यात पाच जणांवर गुन्हा

करमाळा (सोलापूर) : करमाळा तालुक्यात होम क्वारंटाईन केलेल्या व्यक्ती क्वारंटाईन केलेल्या ठिकाणी राहतात की नाही. याची तपासणी केल्यानंतर क्वारंटाईन केलेल्या ठिकाणी राहत नसलेल्या पाच जणांवर करमाळा पोलिसांनी गुन्हा दाखल केला आहे.
सरकारने बाहेरगावातील नागरिकांना पास काढून गावी जाण्यास सवलत दिली आहे. त्याप्रमाणे करमाळा तालुक्यात पुणे, मुंबई, ठाणे, नवी मुंबई, अहमदनगर येथून अनेक नागरिक आले आहेत. त्यांना ग्राम आपत्ती व्यवस्थापन समितीकडून होम क्वारंटाईन व इन्स्टिलेशन क्वारंटाईन केले जात आहे. त्यानुसार क्वरंटाईन झालेल्यांनी दिलेल्या कालावधीमध्ये त्याच ठिकाणी राहणे आवश्यक आहे.
करमाळा पोलिस स्टेशनकडील पोलिस अधिकारी व कर्मचाऱ्यांनी करमाळा तालुक्यातील 21 गावे व करमाळा शहरातील आठ वार्डमधील क्वारंटाईन केलेल्या नागरिकांची तपासणी केली. तेव्हा वंजारवाडी, खातगाव नंबर 2, जेऊर व मलवडी या चार गावातील व्यक्ती क्वारंटाईन केलेल्या ठिकाणी न राहता इतरत्र सापडले. त्यामुळे त्यांच्यावर करमाळा पोलिस स्टेशनला विविध कायदे व कलमान्वये गुन्हे दाखल केले आहेत, अशी माहिती पोलिस निरीक्षक श्रीकांत पाडुळे यांनी दिली.
करमाळा तालुक्यात काही दिवसात बाहेरून लोक आलेले आहेत, त्यापैकी सुमारे 80 टक्के लोक पुणे-मुंबईसारख्या रेड झोनमधून आलेले असून हे लोक क्वारंटाईनचे नियम पाळत नाहीत, अशा लोकांच्या तक्रारी येत आहेत. सोलापूर जिल्ह्यातील ग्रामीण भागात आजपर्यंत कोरोना पॉझिटिव्ह रुग्ण मिळाले आहेत. ते बहुतेक सर्व रुग्ण पुणे- मुंबईसारख्या रेड झोन मधून आलेले आहेत. त्यामुळे ग्राम आपत्ती व्यवस्थापन समितीने अशा लोकांना ज्या ठिकाणी क्वारंटाईन केले आहे त्याच ठिकाणी रहाणे आवश्‍यक आहे. जे नागरिक नियम मोडणार आहेत. त्यांच्यावर गुन्हा दाखल करण्याच्या सूचना करमाळा पोलिस स्टेशनकडील सर्व अधिकारी व कर्मचाऱ्यांना देण्यात आल्या आहेत. त्यातून रोज तालुक्यातील किमान वीस ते पंचवीस गावांना भेटी दिल्या जात आहेत. करमाळा तालुक्यातील सर्व नागरिकांना विशेषतः रेड झोन मधून आलेल्या लोकांना करमाळा पोलिस स्टेशनकडून सूचना देण्यात येते आहेत.