पती-पत्नीस महागात पडली शतपावली 

वैराग (सोलापूर) : वैराग ( ता. बार्शी) येथे पती - पत्नीस रात्रीचे जेवण झाल्यानंतर शतपावली करणे महागात पडले. रस्त्याच्या कडेने पुढे चाललेल्या एकाला पाठीमागून आलेल्या कारने जोरदार धडक दिल्यामुळे ते गंभीर जखमी झाले. ही घटना वैराग-माढा रोडवर तुळशिदास जाधव प्रशालेजवळ घडली. यात बार्शी पंचायत समितीचे लेखाधिकारी बाबासाहेब सुभाष माने (वय 37) रा. शिवाजीनगर, वैराग ता. बार्शी हे गंभीर जखमी झाले आहेत. 
घटनेनंतर तीन दिवसांनंतर कारचालक फतरुद्दीन अलीम मिर्झा (रा. वैराग ता. बार्शी ) याच्याविरोधात वैराग पोलिस ठाण्यात गुन्हा दाखल झाला आहे. याबाबत पोलिसांनी दिलेली माहीती अशी की, बाबासाहेब सुभाष माने हे शिवाजीनगर-वैराग येथे रहिवाशी असून ते बार्शी पंचायत समितीत कनिष्ठ लेखा परिक्षक म्हणून कार्यरत आहेत. रात्रीचे जेवण झाल्यानंतर पावणे दहा वाजण्याच्या सुमारास ते आपल्या पत्नीसह वैराग ते माढा जाणाऱ्या रस्त्यावर शतपावली करण्यासाठी गेले होते. त्यावेळी तुळशीदास जाधव प्रशालेपासून ते माघारी फिरले. त्यावेळी त्यांच्या पाठीमागून एका कारने ठोकर दिली. व कारचालक पुढे अंतरावर थांबून निघून गेला. यावेळी त्यांच्या पत्नीने आरडा -ओरड करीत कार वाहनाचा नंबर व रंग लक्षात ठेवला. तातडीने माने यांना बार्शीला उपचारासाठी हलवले. नातेवाईक व पोलिसांनी लाल रंगाची इंडिका कारचा शोध घेतला. यात एम.12 सीडी 9775 ने मागून जोरात धडक दिली. त्यामुळे ते रस्त्याच्या खाली जोराने आपटले. गंभीर जखमी होऊन ते जागीच बेशुद्ध पडले. या अपघातात त्यांचा उजव्या हाताचा अंगठा फॅक्‍चर झाला. डोक्‍यास, कपाळास, हाता-पायास मार लागला आहे. अपघातानंतर जखमींना वैद्यकीय मदत न पुरविता पळून गेलल्या फतरुद्दीन अलिम मिर्झा याच्या विरोधात गुन्हा दाखल झाला असल्याचे तपास अधिकारी पोलिस कॉन्स्टेबल शशिकांत आळणे हे करीत आहेत.