पंढरपूर : नववधूला प्यायला दिले केमिकलयुक्त पाणी

पंढरपूर : लग्नाचा बस्ता खरेदीसाठी गेलेल्या नववधूला एका कापड दुकानात लायझोल टाकलेले केमिकलयुक्त पाणी प्यायला दिल्याचा धक्कादायक प्रकार समोर आला आहे. दैव बलवत्तर म्हणून उपचारानंतर नववधूची प्रकृती स्थिर आहे. हा संतापजनक प्रकार येथील महावीर नगरमधील आविष्कार कापड दुकानात रविवारी (ता. ८) घडला आहे. याप्रकरणी संबंधीत कापड दुकानादाराविरोधात पंढरपूर शहर पोलिस ठाण्यात तक्रार दिली आहे.

गोपाळपूर (ता. पंढरपूर) येथील भानवसे कुटुंबीय आपल्या नववधूसह येथील आविष्कार कापड दुकानात लग्नाचा बस्ता खरेदी करण्यासाठी ८ मे रोजी आले होते. खरेदीदरम्यान नववधू तरुणीला तहान लागली म्हणून तिने कापड दुकानातील कर्मचारऱ्याकडे पाण्याची मागणी केली. त्यावेळी कापड दुकानातील कर्मचाऱ्याने फरशी पुसण्यासाठी लायझोल टाकलेली केमिकलयुक्त पाण्याची बाटली पाणी म्हणून प्यायला दिली. तहानेने व्याकुळ झालेल्या नववधूने तेच केमिकल युक्तपाणी पिले. काही वेळाने तिल अस्वस्थ वाटू लागल्याने तीने नातेवाईकांना ही प्रकार सांगितला. त्यानंतर नातेवाईकांनी तिला ता़तडीने येथील एका खासगी रुग्णालयात उपचारासाठी दाखल केले.

दोन दिवसाच्या उपचारानंतर आता नववधूची प्रकृती स्थिर असल्याचे नातेवाईकांनी सांगितले. वेळीच नववधूला उपचारासाठी दवाखान्यात दाखल केल्यामुळे नववधूवरील संकट थोडक्यात निभावल्याने नातेवाईकांनी सुटकेचा निश्वास सोडला आहे. याप्रकरणी नववधूच्या नातेवाईकांनी आविष्कार कापड दुकान मालका विरोधात शहर पोलिस ठाण्यात तक्रार दिली आहे. तक्रारीनुसार कापड दुकानराची चौकशी करुन त्यानंतर त्यांच्यावर पुढील कादेशीर कारवाई केली जाईल, असे पोलिस निरीक्षक अरुण पवार यांनी सांगितले.

निष्काळजीपणा ग्राहकांच्या जीवावर

येथील आविष्कार कापड दुकानदाराच्या निष्काळजीपणामुळे ही घटना घडली आहे. येथील कापड दुकानात नेहमीच ग्राहकांची मोठी वर्दळ असते, परंतु दुकानदाराकडून ग्राहकांसाठी पिण्याचे पाणी व पार्किंची सोय केली जात नाही. त्यामुळे ग्राहकांना अशा संकटांना तोड द्यावे लागते. येथे येणाऱ्या ग्राहकांच्या वाहनांसाठी पार्किंगची कोणतीच सोय नसल्याने दुकानासमोरील रस्त्यावरच वाहनांची गर्दी असते. त्यामुळे वर्दळीच्या या रस्त्यावर नेहमीच वाहतूक कोंडी होती.