एकच मुलगी, अनेकांसोबत जमविले विवाह! सांगोला, साताऱ्यातील तरुणांना फसवणारे जेरबंद | Sakal
sakal

बोलून बातमी शोधा

Marriage
एकच मुलगी, अनेकांसोबत जमविले विवाह! सांगोला, साताऱ्यातील तरुणांना फसवणारे जेरबंद

एक मुलगी, अनेकांसोबत जमविले विवाह! सांगोला, साताऱ्यातील तरुणांना फसवणारे जेरबंद

सोलापूर : लग्नाचे आमिष देऊन पैसे व दागिने लुटणारी टोळी फौजदार चावडी पोलिसांनी जेरबंद केली. संतोष काशिनाथ गवंडी, भारती चंद्रकांत पवार (दोघेही रा. धुतर्गी तांडा, विजयपूर) यांना पोलिसांनी अटक करून त्यांच्याकडून 80 हजाराची रोकड व दोन तोळे दागिने जप्त केले आहेत. त्यांनी यापूर्वी एकच मुलगी दाखवून सोलापूर, सांगोला, साताऱ्यातील तरुणांनाही अशाच पध्दतीने फसविल्याची तर काहींना पैशाची मागणी केल्याची प्राथमिक माहिती तपासात समोर आली आहे. त्यांच्या मोबाईलवरून पोलिस अधिक माहिती घेत आहेत. त्यानंतर संबंधित प्रकरणांची सखोल चौकशी करून दोषारोपपत्र दाखल केले जाणार आहे.

हेही वाचा: झेडपीच्या 43 शाळांना लागणार टाळे? कोरोनामुळे ढासळली 'प्राथमिक' गुणवत्ता

घटनेची हकीकत अशी, सोलापुरातील संतोष पवार नावाच्या व्यक्तीने आमच्या मुलीचा विवाह करायचा असून आमचा संसार पुरात वाहून गेल्यामुळे कोणतीच कागदपत्रे नाहीत. आमचे कोणी पाहुणेदेखील नाहीत, असे कडलास (ता. सांगोला) येथील जाधव कुटुंबियांना सांगितले. तसेच आम्ही गरीब असल्याने विवाहाच्या तयारीसाठी दीड लाख रुपयांची मागणी केली. त्यावेळी जाधव कुटुंबीयांनी त्यांना 80 हजार रुपये रोख दिले. मुलगी बघायला आल्यावर गडबडीत साखरपुडा उरकला. 16 मार्च रोजी विवाह करण्याचे ठरले. विवाहाच्या एक दिवस अगोदर नवरीला आणायला मुलाचे आजोबा सोलापुरात आले. त्यावेळी मुलीचे दागिने घेऊन या, असे समोरील व्यक्‍तींनी बजावले. त्यानुसार मुलाचे आजोबा दोन तोळे सोने घेऊन आले. दागिने घेऊन एसटी स्टॅण्डवर या तेथून मुलीला घेऊन आपण गावाकडे जाऊ, असे संशयित आरोपी संतोष याने सांगितले. मुलाचे आजोबा मनोहर जाधव हे एसटी स्टॅंडवर आले. त्यावेळी संतोष गवंडी याने त्यांना दुचाकीवर बसवून हिराचंद नेमचंद वाचनालयाजवळ आणले. त्यावेळी पवारसोबत दोन महिला होत्या. त्या महिला म्हणाल्या, आम्ही मुलीला बांगड्या घेण्यासाठी नवीपेठत आलो आहोत. ते सोने द्या आम्ही आमची अपंग नातलग आहे, तिला दाखवून आणतो. त्यांच्यावर विश्‍वास ठेवून जाधव यांनी ते दागिने त्यांना दिले. काहीवेळाने संतोष हादेशील तेथून पसार झाला. चार वाजेपर्यंत वाट पाहूनही ते न आल्याने त्यांनी गावाकडे फोन करून मुलाला व सुनेला आणि नवऱ्या मुलाला बोलावून घेतले. त्यावेळी त्यांना फसवणूक झाल्याचे समजले. त्यांच्या मोबाईलमधील 'सीडीआर' रिपोर्ट काढण्याची कार्यवाही पोलिसांकडून सुरु आहे. सध्या या प्रकरणातील दोन्ही संशयित आरोपींना न्यायालयाने न्यायालयीन कोठडी सुनावली आहे.

हेही वाचा: आमदार प्रणिती शिंदेंची महाराजांवर टीका! लोकसभा निवडणूक लढणार का?

संभाजी ब्रिगेडचे प्रसंगावधान, अन्‌...
जाधव कुटुंबियांच्या फसवुणकीची माहिती संभाजी ब्रिगेडचे सांगोला तालुकाध्यक्ष प्रदीप मिसाळ यांनी सोलापूर शहराध्यक्ष शाम कदम यांना दिली. शहराध्यक्ष कदम, कार्याध्यक्ष अरविंद शेळके, उपाध्यक्ष गजानंद शिंदे, संघटक मल्लू भंडारे यांनी जाधव यांची भेट घेऊन फौजदार चावडी पोलिसांत धाव घेतली. वरिष्ठ पोलिस निरीक्षक उदयसिंह पाटील यांनी तत्काळ त्या आरोपींचे मोबाइल लोकेशन शोधून काढले. जुळे सोलापुरातील कल्याण नगर येथे त्यांचे लोकेशन दाखविले आणि पोलिसांनी संशयितांना पकडले. पळून जाण्याचा प्रयत्न करताना संभाजी ब्रिगेडच्या कार्यकर्त्यांनी त्यांचा पाठलाग करून त्यांना पकडले.

Web Title: One Daughter Married To Manyfor Cheating Youth Sangola Satara

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..