सायबर पोलिस म्हणाले ! मद्यपेय घरपोच मिळेल अशा खोट्या मेसेजवर... 

सोलापूर : कोरोना या विषाणूचा प्रादुर्भाव रोखण्यासाठी देशात लॉकडाउन व संचारबंदी लागू करण्यात आली आहे. त्यामुळे इंटरनेटचा वापर वाढला असून अनेक कंपन्यांकडून फसवे मेसेज (लिंक) फेसबूक, व्हॉट्‌सअप आणि मोबाइल क्रमांकावर येत आहेत. मद्यपेय 30 ते 40 मिनिटात घरपोच मिळेल यासह अन्य मेसेज पाठविले जात असून नागरिकांनी त्याला बळी पडू नये, असे आवाहन सायबर पोलिसांनी केले आहे. 

हेही नक्‍की वाचा : महाविद्यालयीन परीक्षेबाबत मोठा निर्णय ! थेट तिसऱ्या वर्षाचीच परीक्षा 

लॉकडाउनमध्ये सर्वजण घरात बसून आहेत. त्यांच्याकडून इंटरनेटचा वापर वाढल्याने अनेक कंपन्यांकडून खोटे मेसेज तथा लिंक पाठविल्या जात आहेत. त्यामध्ये प्रधानमंत्री आवास योजनेअंतर्गत कुटुंबातील एका सदस्यास 25 हजार रुपये मिळतील. त्यासाठी दिलेल्या लिंकवरुन फॉर्म भरावा, असे सांगितले जात आहे. तर प्रधानमंत्री बेरोजगार भत्ता योजनेअंतर्गत नोंदणी करा अन्‌ महिन्याला साडेतीन हजार रुपये मिळवा, मात्र त्यासाठी मोबाईलवरील लिंकवरुन अर्ज भरावा, असे बजावले जात आहे. तसेच आम्ही पाठविलेली लिंक 20 लोकांना तथा पाच व्हॉट्‌सअप ग्रूपला पाठवा अन्‌ दोन महिन्यांकरिता नेट फ्री मिळवा, असेही मेसेज येत आहेत. जीओ कंपनीकडून दररोज 25 जीबीचा डेटा सहा महिन्यांकरिता मिळेल, मात्र लिंक डाउनलोड करुन नोंदणी करा, असे सांगितले जाते. नागरिकांच्या मोबाईलवर कॉल करुन तुमच्या ईएमआयची तारीख जवळ आली असून त्यात वाढ केली जाईल. मात्र, त्यासाठी तुमच्या मोबाईलरील ओटीपी शेअर करा, असेही कॉल येत आहेत. 

हेही नक्‍की वाचा : सहाशे कोटींची शिष्यवृत्ती अडकल्याने इंजिनिअरिंगच्या प्राध्यापकांची उपासमार 

मद्यपेय घेणाऱ्यांसाठी अनोखा सायबर गुन्हेगारांचा फंडा 
लॉकडाउन अन्‌ संचारबंदीमुळे मद्यपेय घेणाऱ्यांची मोठी पंचाईत झाली आहे. अनेक ठिकाणी वेगवेगळे प्रकार घडत असल्याचे ओळखून आता सायबर गुन्हेगारांनी मद्यपेय घेणाऱ्यांसाठी फसवणुकीचा अनोखा फंडा तयार केला आहे. 30 ते 40 मिनिटांमध्ये घरपोच मद्यपेय मिळेल, त्यासाठी दिलेल्या लिंकवर नोंदणी करा, असे फेसबुकवरुन खोटे मेसेज व्हायरल केले जात आहेत. अशा कोणत्याही अमिषाला नागरिकांनी बळी पडू नये, असे आवाहन सायबर पोलिस ठाण्याचे वरिष्ठ पोलिस निरीक्षक अरुण फुगे यांनी केले आहे.