प्रधानमंत्री सन्मान योजना : अपात्र शेतकऱ्यांकडून 15 लाखांची वसुली

पंढरपूर (सोलापूर) - प्रधानमंत्री सन्मान योजनेतील अपात्र शेतकऱ्यांवर पंढरपूरचे तहसीलदार सुशील बेल्हेकर यांनी कारवाईचा बडगा उगारताच अशा शेतकऱ्यांनी सुमारे 15 लाख रुपये शासनाला परत केले आहेत. या कारवाई अंतर्गत तालुक्‍यातील सुमारे दोन हजार अपात्र शेतकऱ्यांची बॅंक खाती सील करण्यात आली आहेत. या कारवाईनंतर खडबडून जागे झाल्या या शेतकऱ्यांची पैसे भरण्यासाठी धावपळ सुरु केली आहे.

प्रधानमंत्री सन्मान योजनेसाठी तालुक्‍यात सुमारे 79 हजार 441 लाभार्थी शेतकरी आहेत. दरम्यान विविध कारणांमुळे या योजनेसाठी अपात्र ठरलेल्या शेतकऱ्यांकडून लाभाची रक्कम वसूल करण्यासाठी तालुक्‍यातील सुमारे दोन हजार शेतकऱ्यांची बॅंक खाती सील करण्यात आली आहेत. तहसीलदारांच्या कारवाईच्या बडग्यानंतर अपात्र शेतकऱ्यांनी घेतलेल्या लाभाची रक्कम परत करण्यास सुरवात केली आहे. मागील पंधरा दिवसामध्ये 196 बॅंकांकडून 14 लाख 98 हजार 298 रुपये शासनाकडे परत करण्यात आले आहेत.

प्रधानमंत्री किसान सन्मान योजनेसाठी पात्र झालेल्या 940 शेतकऱ्यांचा मृत्यु झाला आहे तर 1 हजार 897 शेतकरी आयकर पात्र ठरले आहेत. अशा अपात्र शेतकऱ्यांकडून जवळपास 2 कोटी 38 लाख 36 हजार रुपये वसुल केले जाणार आहेत. सन्मान योजनेतून मिळालेले पैसे तत्काळ भरावेत यासाठी प्रशासनाकडून नोटिसा देण्यात आल्या आहेत. मात्र संबंणित शेतकऱ्यांकडून सकारात्मक प्रतिसाद मिळत नसल्याने अखेर महसूल प्रशासनाने वसुलीसाठी अपात्र ठरलेल्या दोन हजार शेतकऱ्यांची बॅंक खाती सील केली.

प्रशासनाच्या कारवाईनंतर 47 अपात्र शेतकऱ्यांनी 3 लाख 56 हजार रुपये तर आयकर पात्र 910 शेतकऱ्यांनी 90 लाख 70 रुपये यापूर्वीच भरले आहेत. अन्य शेतकरी मात्र पैसे भरण्यास चालढकल करत आहेत. अशा शेतकऱ्यांची बॅंक खाती सील केली आहेत. त्यानंतरही जे शेतकरी लाभाची रक्कम परत करणार नाहीत, अशा शेतकऱ्यांच्या सातबारा उताऱ्यावर बोजा चढवण्याची कारवाई केली जाईल, असा इशाराही तहसीलदार श्री. बेल्हेकर यांनी दिला आहे.