पुणे शहर, जिल्ह्यात २४ तासात ३० मिमी पाऊस

पुणे : पुणे शहर व जिल्ह्यात यंदाच्या पावसाळ्यातील दिवसातील सर्वाधिक पाऊस सोमवारी (ता.११) नोंदला गेला आहे. गेल्या २४ तासात पुणे शहरात १६.८ मिमी तर, जिल्ह्यात ३० मीमी पाऊस पडला आहे. दरम्यान, या पावसामुळे पुणे शहराला पिण्याच्या पाण्याचा पुरवठा करणाऱ्या खडकवासला प्रकल्पातील चारही धरणातील पाणीसाठ्यात मोठी वाढ झाली आहे.

या प्रकल्पात आता ८.७० पीएमसी पाणी साठां झाला आहे. एकूण पाणीसाठ्याचे हे प्रमाण २९.८५ टक्के इतके झाले आहे. गेल्या वर्षीच्या याच तारखेच्या तुलनेत ०.०७ टीएमसीने जास्त पाणी साठा झाला आहे. गेल्या वर्षी याच तारखेला या धरणांत एकूण ८.६३ टीएमसी (२९.६२ टक्के) पाणीसाठा शिल्लक होता, असे जलसंपदा विभागाच्यावतीने सोमवारी (ता.११) सकाळी सहा वाजता प्रसिद्ध करण्यात आलेल्या धरणसाठा आकडेवारी अहवालातून स्पष्ट झाले आहे.

दरम्यान, जिल्ह्यात सर्वाधिक ८८.८ मिमी पाऊस वेल्हे तालुक्यात तर, सर्वांत कमी म्हणजे केवळ ०.९ मिमी पाऊस इंदापूर तालुक्यात नोंदला गेला आहे.खडकवासला प्रकल्पांतील चारही धरणांच्या पाणलोट क्षेत्रात संततधार पाऊस सुरु आहे.खडकवासला प्रकल्पात खडकवासला, वरसगाव, पानशेत आणि टेमघर ही चार धरणे येतात. गेल्या २४ खडकवासला धरणाच्या पाणलोट क्षेत्रात १९ मिलिमिटर, पानशेत पाणलोट क्षेत्रात १०५ मिलिमिटर, वरसगाव पाणलोट क्षेत्रात ९७ आणि टेमघर पाणलोट क्षेत्रात ११० मिलिमिटर इतका पाऊस झाला आहे.

धरणनिहाय ११ जुलैचा पाणीसाठा (टीएमसीमध्ये)

- खडकवासला --- १.२८

- पानशेत --- ३.२५

- वरसगाव --- ३.५५

- टेमघर --- ०.६२

- चारही धरणांतील एकूण साठा --- ८.७०

- गेल्या वर्षीचा या तारखेचा साठा --- ८.६३

पुणे शहरातील पाऊस मिमीमध्ये

- कर्वेनगर ---- १३ मिमी

- शहर (मध्यवर्ती) ---२०.५

- कोथरूड ---- ३५.५

- खडकवासला ---- २३

- हडपसर ---- ७.८

- वाघोली ----- १०.८