Solapur Crime : शेवरे खूनप्रकरणातील दोघांना अटक; एकास सोमवारपर्यंत पोलिस कोठडी, स्थानिक गुन्हे शाखेची मदत

टेंभुर्णी : शेवरे येथे शेतीच्या कारणावरून पुतण्याने चुलत्याच्या गळ्यावर कुऱ्हाडीचा घाव घालून खून केल्याप्रकरणी सोमवारी रात्री चार आरोपींपैंकी एक आकाश जाधव (वय ३०) यास अटक केली असून, त्यास माढा न्यायालयात हजर केले असता सोमवार (ता.१८) पर्यंत पोलिस कोठडीत ठेवण्याचे आदेश माढा न्यायदंडाधिकाऱ्यांनी दिले आहेत.

तर मंगळवारी आरोपी शिवाजी जाधव (वय २७) स्वतः अकलूज पोलिस ठाण्यात हजर झाला असून, त्यास ताब्यात घेऊन टेंभुर्णी पोलिसांनी रात्री अटक केली आहे.

यातील मयत शंकर जाधव यांचे धडावेगळे केलेले शीर सोमवारी सायंकाळी पोलिसांना मिळाल्यानंतर मंगळवारी शवविच्छेदन होऊन दुपारी शेवरे येथे त्यांच्यावर अंत्यसंस्कार करण्यात आले. या घटनेची माहिती समजताच टेंभुर्णी पोलिस ठाण्याचे सहायक पोलिस निरीक्षक गिरीश जोग व त्यांचे सहकारी घटनास्थळी आले.

उपविभागीय पोलिस अधिकारी अजित पाटील यांनी घटनास्थळास भेट देऊन पाहणी केली. तसेच स्थानिक गुन्हे अन्वेषण विभागाची आरोपींना शोधण्यासाठी मदत घेण्यात आली. मंगळवारी सकाळी शंकर जाधव यांच्या मृतदेहाचे टेंभुर्णीतील प्राथमिक आरोग्य केंद्रात शवविच्छेदन करण्यात येऊन दुपारी शेवरे येथे त्यांच्यावर अंत्यसंस्कार करण्यात आले.

सोमवारी रात्री स्थानिक गुन्हे अन्वेषण विभागाच्या पोलिसांनी या गुन्ह्यातील आकाश बाबासाहेब जाधव (वय ३०) यास पकडून टेंभुर्णी पोलिसांच्या ताब्यात दिले. आरोपी आकाश जाधव यास अटक करून माढा न्यायालयात हजर केले असता, माढा न्यायालयाचे प्रथमवर्ग न्यायदंडाधिकारी जी. व्ही. गांधे यांनी आरोपीस सोमवार (ता.१८) पर्यंत पोलिस कोठडी सुनावली.

अकलूज पोलिस ठाण्यात आरोपी स्वतः हजर

या खून प्रकरणातील आरोपी शिवाजी जाधव (वय २७) हा मंगळवारी अकलूज येथील पोलिस ठाण्यात स्वतः हजर झाला. यानंतर टेंभुर्णी पोलिसांनी त्यास ताब्यात घेऊन चौकशी केली नंतर त्यास रात्री अटक केली.