गटबाजीला कंटाळून शिवसेना उपजिल्हाप्रमुखाचा राजीनामा !

करमाळा (सोलापूर) : शिवसेनेचा (Shiv Sena) उपजिल्हाप्रमुख म्हणून काम करत असताना संघटनेकडून कधी विचारात घेतले गेले नाही. तसेच शिवसेना पक्षात मोठ्या प्रमाणात गटबाजी असल्याने या गटबाजीला कंटाळून आपण शिवसेना उपजिल्हाप्रमुख पदाचा राजीनामा देत असल्याचे भरत आवताडे (Bharat Awtade) यांनी पत्रकार परिषदेत सांगितले.

भरत आवताडे म्हणाले, शिवसेना पक्षाचा कुठलाही कार्यक्रम घ्यायचा असेल तर आपल्या पक्षातील स्थानिक पदाधिकाऱ्यांचा विरोध होत असल्यामुळे पक्षवाढीसाठी कुठल्याही प्रकारचे काम न करता आल्यामुळे करमाळा तालुक्‍यात शिवसैनिकांची अवस्था बिकट झाली आहे. शिवसेनेचा नेता कोण, हे कोणालाही सांगता येत नाही. 2019 मध्ये झालेल्या विधानसभा निवडणुकीत शिवसेना भवनमधून सोलापूर जिल्हाप्रमुख, उपजिल्हाप्रमुख, सर्व तालुकाध्यक्ष यांना मुंबईला मीटिंगसाठी बोलावले असताना जिल्हाप्रमुखांनी, करमाळ्यातील पदाधिकाऱ्यांनी याबाबत आम्हाला सांगितले नाही. आम्हाला विचारात घेतले नाही.

इंधन दरवाढीच्या विरोधात जेव्हा आंदोलन झाले. त्यावेळी सुद्धा मोठ्या प्रमाणात गटबाजी झाली. पक्ष ज्याला विधानसभेची उमेदवारी देईल त्याचे काम करायचे, असे असताना शिवसेनेची उमेदवारी रश्‍मी बागल यांना मिळाली. आम्ही पदाधिकाऱ्यांनी विधानसभेला एकनिष्ठेने काम केले. मात्र इतर पदाधिकाऱ्यांनी विधानसभेला बंडखोरी करून विरोधात असणाऱ्या उमेदवाराचा प्रचार केला. सध्याच्या परिस्थितीमध्ये आज तेच लोक राज्यात शिवसेनेची सत्ता आल्यानंतर आम्हाला डावलून पक्षाचे अधिकृत पद नसतानाही स्वतः पद असल्याचे सांगून पदाधिकारी म्हणून मिरवत आहेत. त्यांना पक्षाशी काही देणे-घेणे नाही.

माझ्या शिवसेनेच्या कारकिर्दीत कोरोना महामारीच्या काळामध्ये नागरिकांच्या आरोग्याची काळजी घेऊन आरोग्याचा महायज्ञ म्हणून शिवजयंतीनिमित्त सामाजिक उपक्रम घेण्यात आले. आम्ही इमानेइतबारे काम करून सुद्धा शिवसेनेचे इतर पदाधिकारी मात्र आमच्याबरोबर निष्ठेने काम न करता विरोधात काम करत आहेत. तालुक्‍यात कुठलेही प्रकारचे संघटन नाही, असेही आवताडे म्हणाले.