Solapur : भिमा च्या सभासदांच्या खात्यावर दिवाळी बोनस

मोहोळ : टाकळी सिकंदर ता मोहोळ येथील भीमा सहकारी साखर कारखान्याने सन 2021/22 या गाळप हंगामात गाळपास आलेल्या उसाची पूर्ण एफ आर पी ची रक्कम शेतकऱ्याच्या खात्यावर वर्ग केली असून, दिपवाळीच्या सणासाठी म्हणून 50 रुपये प्रति टना प्रमाणे हप्ता व एकूण एफआरपी मिळून 104 कोटी रुपयांचे वाटप केले आहे.

ऊस उत्पादक सभासदांची दिपवाळी गोड व्हावी या साठी प्रति सभासद 25 किलो साखर व दहा हजार फराळांच्या बॉक्सचे वाटप तसेच कामगारांची दिपवाळी गोड व्हावी म्हणुन 8.33 टक्के बोनस वाटप करण्यात आल्याची माहिती कारखान्याचे अध्यक्ष खा धनंजय महाडिक यांनी दिली.

या संदर्भात अधिक माहिती देताना कारखान्याचे उपाध्यक्ष सतीश जगताप म्हणाले, कारखाना प्रशासनाने चालू गळीत हंगाम यशस्वी करण्यासाठी जय्यत तयारी केली असून, ऊस तोडणी टोळ्या कारखाना कार्यस्थळावर दाखल होत आहेत. खासदार महाडिक हे दिलेला शब्द पाळणारे आहेत. त्यांनी यापूर्वी दिलेली सर्व आश्वासने पाळली आहेत.

चालू गळीत हंगामात गाळपासाठी येणाऱ्या उसाला पहिली उचल प्रति टन 2 हजार 100 रुपया प्रमाणे जाहीर केली आहे. त्यामुळे सभासदात आनंदाचे वातावरण आहे. शनिवार ता 22 ऑक्टोबर पासून सभासदांना साखर वाटपास कारखाना कार्यस्थळा वर सुरुवात करण्यात आली आहे.

शनिवार ता 22 रोजी टाकळी सिकंदर व अंकोली गट, रविवार ता 23 रोजी तारापूर व कुरुल, सोमवार ता 24 रोजी पेनुर व इंचगाव, मंगळवार ता 25 रोजी पुळुज ब्रह्मपुरी गट व नव्याने कार्यक्षेत्रात समाविष्ट करण्यात आलेल्या गावातील सभासदांना साखर वाटप करण्यात येणार आहे.

दरम्यान पापरी ता मोहोळ येथे रविवार ता 23 रोजी फराळाच्या बॉक्सचे वाटप लोकशक्ती परिवाराचे सर्वेसर्वा मनोहर डोंगरे, भिमाचे संचालक राजेंद्र टेकळे, यांच्या हस्ते सभासदांना करण्यात आले. यावेळी कुमार टेकळे, बाळासाहेब टेकळे, रमेश टेकळे, राजेंद्र टेकळे, तहसीलदार सचिन डोंगरे, प्रशांत पाटील, समाधान चव्हाण उपस्थित होते. चालू गळीत हंगामात सभासदानी आपला ऊस भीमा कारखान्यास देऊन सहकार्य करण्याचे आवाहन संचालक राजेंद्र टेकळे यांनी केले.