Solapur : स्वागतासाठी बुके नको, फूलच द्या; उपमुख्यमंत्र्यांच्या कार्यकर्त्यांना सूचना

सोलापूर - उपमुख्यमंत्री देवेंद्र फडणवीस यांच्या दौऱ्याच्या पार्श्वभूमीवर कार्यकर्त्यांनी जोरदार तयारी केली होती. विमानतळावरही सर्वांना परवानगी देण्यात आली होती. त्यामुळे जिल्ह्यातील लोकप्रतिनिधी आणि पदाधिकाऱ्यांनी हातात भले मोठे बुके घेऊन फडणवीस यांच्या स्वागतासाठी सज्ज होते.

उपमुख्यमंत्री फडणवीस आल्यानंतर स्वागतासाठी कार्यकर्त्यांनी बुके पुढे करताच आपल्याला बुके नको, फूल द्या असे म्हणत त्यांनी सर्वांचे बुके नाकारले. गुलाबाचे फूल स्वीकारत त्यांनी सर्वांचा सन्मान स्वीकारला.गेल्या वर्षभरापासून उपमुख्यमंत्री देवेंद्र फडणवीस यांच्या सोलापूर दौऱ्याला मुहूर्त लागत नव्हता.

निवडणुकीच्या पार्श्वभूमीवर हौसे-नवसे सर्वच कार्यकर्त्यांसह लोकप्रतिनिधीं नाही उपमुख्यमंत्री देवेंद्र फडणवीस यांची आस लागून राहिली होती. गुरुवारी अखेर तो दिवस उजाडला आणि कार्यकर्त्यांनी जंगी स्वागताचा बेत आखला. उपमुख्यमंत्री देवेंद्र फडणवीस यांचे गुरुवारी (ता. २५) दुपारी १२.३५ वाजता विमानतळावर आगमन झाले.

विमानतळावर खासदार डॉ. जयसिद्धेश्वर शिवाचार्य महाराज, खासदार रामराजे नाईक-निंबाळकर, आमदार विजयकुमार देशमुख, आमदार सुभाष देशमुख, आमदार समाधान अवताडे, आमदार राम सातपुते, आमदार रणजितसिंह मोहिते-पाटील, शहराध्यक्ष विक्रम देशमुख यांच्यासह पदाधिकारी उपस्थित होते.