Solapur : मोहोळ तालुक्यात परतीच्या पावसाने मोठे नुकसान मात्र 65 मिलिमीटर ची अट शेतकऱ्यांना अडचणीची

मोहोळ : मोहोळ तालुक्यातील काही भागात पाऊस पडून विविध पिकासह फळबागांचे मोठे नुकसान झाले आहे. मात्र शासन निकषा प्रमाणे 65 मिलिमीटर पाऊस झाला नाही. तसेच शेतकऱ्यांनी शासनाने दिलेल्या "ॲप" वरून पीकपाहणी केली नसल्याने नुकसानीचे पंचनामे करण्यात अडचणी येत आहेत. तरीही ज्या भागात नुकसान झाले आहे त्या नुकसान ग्रस्त क्षेत्राला तलाठी व कृषी सहाय्यक यांना समक्ष भेटी देऊन नुकसानीचा नजर अंदाज अहवाल सादर करण्याच्या सूचना दिल्याची माहिती तहसीलदार प्रशांत बेडसे यांनी दिली.

तालुक्यातील पाऊस पडून झालेल्या नुकसानी बाबत कृषी सहाय्यक, तलाठी व मंडल निरीक्षक यांना सूचना देण्यासाठी व चर्चा करण्यासाठी संयुक्त बैठकीचे आयोजन केले होते त्यावेळी ते अधिकाऱ्यांना मार्गदर्शन करत होते. सर्व तलाठी व कृषी सहाय्यकांना नुकसानीचा नजर अंदाज देण्याच्या सूचना दिल्या असून, त्यांच्याकडून अहवाल आल्यानंतर तालुक्याच्या नुकसानीचा एकूण अहवाल जिल्हाधिकारी यांना देण्यात येणार आहे व त्यानुसार त्यांनी दिलेल्या आदेशान्वये पंचनामे करण्यात येणार आहेत.त्यानंतर नुकसानीच्या निधीची मागणी करण्यात येणार आहे. ज्या ठिकाणी तक्रारी व अडचणीचा विषय आहे त्या ठिकाणी मी स्वतः जाऊन पाहणी करणार असल्याचेही तहसीलदार बेडसे यांनी सांगितले.

आपापल्या गावात किती पाऊस पडला या बाबत नक्की माहिती मिळविण्या साठी गावोगावी पर्जन्य मापक बसवणे गरजेचे आहे. एका पर्जन्य मापकाची किंमत सुमारे सहा ते सात हजार असणार आहे, हे काम ग्रामपंचायत ही करू शकते. आवश्यकते नुसार तशा त्यांना सूचनाही देण्यात येणार आहेत. सध्या शासना कडुन बागायत पिकाच्या नुकसानी साठी हेक्टरी 13 हजार 500 रुपये, जिरायती पिकाच्या नुकसानी साठी 6 हजार 800 रुपये तर फळबागांच्या नुकसानीसाठी हेक्टरी 18 हजार रुपये मदत दिली जाते.

---- मोहोळ तालुक्यात मंडल निहाय पडलेला सरासरी पाऊस पुढील प्रमाणे--------

मोहोळ-583.68

वाघोली-380

कामती-540

टाकळी-289.9

सावळेश्वर-398

नरखेड-518

शेटफळ-444

पेनुर-281.8

तालुक्याची पावसाची एकुण सरासरी-600 मिलीमिटर तालुक्यात पडलेला एकुण पाऊस-430 मिलीमिटर