Solapur News: महापालिका आयुक्त शीतल तेली-उगले यांचे नववर्षातील धोरण

सोलापूर : चांगल्या कार्याची सुरवात करण्यासाठी दिवस ठरवावा लागत नाही. त्यामुळे नवीन वर्षाचा कोणताही संकल्प अथवा विकल्प मी करणार नाही. परंतु चालू स्थितीतील प्रकल्प दिलेल्या मुदतीत पूर्ण करून शहरवासीयांना अधिकाधिक सुविधा कशा पद्धतीने देता येईल, यावर माझा भर असेल, असे महापालिका आयुक्त शीतल तेली-उगले यांनी सांगितले.

महापालिका प्रशासन आणि नागरिक यांच्यामध्ये विकासात्मक कामातून जवळीकता निर्माण होण्याऐवजी असुविधांमुळे नेहमीच दुरावा राहिला आहे. राजकीय नेते आणि अधिकारी यांच्या राजकारणात भरडला जाणारा विकास प्रशासकीय कारकिर्दीत उभारी घेईल, असा विश्वास शहरवासीयांना होता, तोदेखील विश्वास मागील वर्षभरात प्रशासनाला दाखविता आले नाही. स्मार्ट सिटीतून शहर गावठाण भाग विकसित झाला असला तरी शहर हद्दवाढ भागात अद्यापही मूलभूत सुविधाही पोचल्या नाहीत.(Solapur News)

प्रशासनासमोर पाणीपुरवठा, रस्ते, ड्रेनेज या आव्हानांसह शहराचे आरोग्यही चांगले राहण्यासाठी प्रयत्न करावे लागणार आहेत. मागील वर्षात मोठ्या प्रमाणात विविध विकास कामांचे कोट्यवधी रुपयांचे टेंडर काढण्यात आले. या काढलेल्या टेंडरची कामे या नव्या वर्षात पूर्ण करून घेण्याची जबाबदारी नव्या आयुक्तांवर आली आहे. आयुक्तांच्या विरोधात कामगार, आयुक्त विरुध्द सीईओ, आयुक्त विरुध्द पदाधिकारी व लोकप्रतिनिधी असेच काहीसे चित्र पाहायला मिळाले. गतिमान प्रशासनासाठी केवळ आयुक्तांचा निर्णय महत्त्वाचा नसून अंमलबजावणी करणारे संबंधित अधिकाऱ्यांच्या कामाची गती महत्त्वाची आहे.

मागील वर्षात सोलापूरकरांनी प्रशासकीय कारभाराचा आणि निवडणुकीच्या प्रतीक्षेत असलेल्या सदस्यांचा विकास सोलापूरकरांनी पाहिला. गेल्या अनेक वर्षांपासून असलेली आव्हाने ही यंदाच्या वर्षीही कायम असणार आहेत. नूतन आयुक्त शीतल तेली-उगले यांच्यासमोर असलेल्या नवीन आव्हानांबाबत नव्या वर्षातील नव्या संकल्पना बाबत बोलताना त्या म्हणाल्या की, नवे संकल्प किंवा नवे विकल्प यावर माझा विश्वास नाही. शहरातील विकास कामे ठरवून करता येणार नाही. सध्या अर्धवट, चालू स्थितीतील कामे पूर्ण प्रकल्प प्राधान्याने मुदतीत पूर्ण करण्यासाठी नियोजनबद्ध आराखडा तयार करण्यावर भर असेल.

सरत्या वर्षातील सार

वॉटर ऑडिट, मिळकतींच्या सर्व्हेतून अपडेट डाटा संकलन

ड्रोनद्वारे प्रथमच शहराचा डिजिटल विकास आराखडा

ई-ऑफिसमुळे कामकाजात आणला पारदर्शीपणा

समांतर जलवाहिनी अडकली निविदेत

निवडणुकीच्या प्रतीक्षेत सरले वर्ष

नवीन वर्षातील आव्हाने

शहर पाणीपुरवठा सुरळीत करणे

समांतर जलवाहिनीचा मार्गी लावणे

महसूल उत्पन्न वाढवून शहराचा विकास साधणे

अमृत दोन व उड्डाणपुलासाठी निधी मिळविणे

विकासाचा तीनतेरा अन्‌ महापालिका निवडणुकीची धामधूम