Solapur : महापालिकेचा अर्थसंकल्प आज होणार सादर

सोलापूर : महापालिकेचे २०२३-२४ या आर्थिक वर्षाचे अंदाजपत्रक आज सोमवारी २० फेब्रुवारी रोजी सादर होणार आहे. गतवर्षीच्या अंदाजपत्रकातील भांडवली निधीतून करण्यात आलेल्या २५ कोटींच्या १७ रस्त्यांमुळे सोलापूकरांना दिलासा मिळाला. नूतन आयुक्त शीतल तेली उगले यांचे वास्तववादी बजेटकडे सोलापूकरांचे लक्ष आहे.

महापालिकेचे महसुली उत्पन्न आणि होणारा खर्च आदींचा ताळेबंद हा वास्तववादी असायला पाहिजे, यावर प्रशासनाचा भर आहे. गतवर्षी मंजूर अंदाजपत्रकाचा कारभार हा प्रशासकाच्या हाती आला.

तत्कालीन आयुक्त पी. शिवशंकर यांनी नगरसेवकांची भांडवली निधीचा योग्य विनियोग करीत शहरातील मुख्य रस्ते दुरुस्ती हाती घेतले. ज्या रस्त्यांवर मोठी वर्दळ आहे, अशा १७ रस्त्यांची दुरुस्ती करून शहरातील रिंगरुट रस्ते सुस्थितीत केले. त्यामुळे सोलापूकरांना दिलासा मिळाला. या वर्षीही शासनाचे मोठे प्रकल्प आहेत,

ते पूर्णत्वास नेऊन विशिष्ट असा परिसर नव्हे तर संपूर्ण शहराचा समतोल विकास साधेल यावर आयुक्त शीतल तेली-उगले यांनी भर देणार असल्याचे सांगितले. त्यामुळे शहरातील कोणकोणते प्रकल्प मार्गी लागणार,

त्यातून शहराचा समतोल विकास कसा साधणार? नागरिकांच्या समस्यांवर कशा पध्दतीने तोडगा काढणार? नव्याने कोणते महत्वपूर्ण प्रकल्प हाती घेणार? शहराचा पाणीपुरवठा सुरळीत करण्यासाठी धोरणात्मक निर्णय काय असणार? याकडे सोलापूकरांचे लक्ष लागून राहिले आहे.