Solapur News : उन्हाचा चटका अन्‌ जिवाची तगमग; ऐन श्रावणात वैशाख वणव्याच्या झळा

रोपळे - पंढरपूर शहर व तालुक्यात पावसाने दडी मारल्यामुळे लोकांना ऐन श्रावणात वैशाख वणव्याच्या झळा अनुभवायला मिळू लागल्या आहेत. जिवाची काहिली करणाऱ्या या उन्हामुळे सगळेच हैराण झाले आहेत. उन्हाच्या चटक्याने लोकांच्या जिवाची तगमग होऊ लागली आहे.

श्रावणात नेहमीच ‘घन निळा बरसतो’ या गाण्यातील आशयाचे दृश्य दिसते. मात्र यावेळी श्रावणात चक्क कडक उन्हाचा त्रास लोकांना सहन करावा लागत आहे. जून महिन्यात पावसाला सुरवात होत असते. यंदा सप्टेंबर हा ऐन पावसाचा महिना असूनही पावसाची चाहूल देखील लागत नाही.

गेल्या महिन्यात काही भागात कुठे तरी तुरळक पावसाच्या हलक्या सरी पडल्या होत्या. त्यावर खरिपातील पिके तग धरून उभी होती. सध्या ही पिकेही पाण्यावाचून माना टाकू लागल्या आहेत. त्यातच दुपारी ३३ अंश सेल्सिअसपर्यंत तापमानात वाढ झाली होती.

माणसांसह मुक्या जनावरांची तगमग

राखी पौर्णिमा झाल्यावर जिल्ह्यात परतीचा पाऊस येतो. मात्र सगळीकडे पावसाऐवजी कडक उन्हाचा फटका सहन करावा लागत आहे. त्यामुळे जनावरांसह माणसांची तगमग वाढली आहे.

उन्हाचा त्रास सहन होत नसल्यामुळे शेतकरी दुपारच्या वेळी आपल्या शेतातील झाडाच्या सावलीचा आधार घेत आहेत. तर जनावरांना शेतात चरायला चारा नसल्यामुळे सावलीला बांधून ठेवल्याचे चित्र सगळीकडे दिसत आहे.

भयंकर ऊन पडतंय, त्यामुळं जिवाची तगमग होतेय. शेतातील पिके सुकली आहेत. उन्हामुळे दुपारी शेतात कामे करू वाटत नाहीत. नुसतं झाडाच्या सावलीत बसून राहावे असे वाटते.

- कुमार आदमिले, शेतकरी, रोपळे बुद्रूक, ता. पंढरपूर

शेतकऱ्यांनी सध्याच्या परिस्थितीत पाण्यावाचून तग धरून राहिलेली पिके वाचवण्यासाठी योग्य त्या औषधांची पिकांवर फवारणी करावी.

- अजय आदाटे, कृषितज्ज्ञ, मंगळवेढा