सोलापूर : सलगर बुद्रुक गावासह सोलापूरच्या शिरपेचात मानाचा तुरा

सलगर बुद्रुक: मंगळवेढा जिल्हा सोलापूर दुबई येथे झालेल्या हॉलिबॉल स्पर्धेत, अजिंक्य ठरलेल्या भारतीय संघातील प्रमुख खेळाडू बसवराज धायगोंडे याची आगामी 14 मार्च पासून सुरू होणाऱ्या आफ्रिका व 2 जून पासून सुरू होणाऱ्या लंडन येथील हॉलीबॉल स्पर्धेसाठी भारतीय संघात निवड झाली आहे.

सलगर बुद्रुक हे सोलापूर,सांगली व विजयपूर या सीमेवरील दुष्काळसदृश्य गाव.या गावात सामान्य शेतकरी कुटुंबात दोन मोठ्या बहिणींच्या पाठी जन्मलेल्या बसवराजला लहान पणापासून खेळाची विशेष आवड होती.त्यातच सलगर बुद्रुक हे गाव हॉलीबॉल खेळासाठी जिल्ह्यात नावाजलेले गाव होते.इथे भरवलेल्या हॉलीबॉल स्पर्धेत राज्यभरातून संघ येत असत.त्यामुळेच बसवराजला या खेळाची गोडी वाढली.

गावातील जुन्या जाणकार हॉलीबॉल खेळाडुंनी बसवराजला हेरले होते.दहावी पर्यंतचे शिक्षण गावी घेतल्यानंतर पुढील शिक्षणासाठी बसवराजने सोलापूर गाठले.व तिथेच त्याच्या खेळाला वाव मिळून पुढे त्याने इथपर्यंत मजल मारली आहे.दरम्यान भारतीय संघात बसवराज बरोबर शोएब बेगंपुरे या खेळाडूची देखील निवड झाली आहे.

स्पॉन्सर ची गरज - दरम्यान 14 मार्च पासून आफ्रिका येथे होणाऱ्या स्पर्धेसाठी बसवराजची भारतीय संघात निवड झाली खरी पण कोणी स्पॉन्सर मिळत नसल्याने या स्पर्धेत खेळण्याचे बसवराजचे स्वप्न सत्यात उतरणार की नाही हे पहावे लागणार आहे.दुबई येथे झालेली स्पर्धा बसवराज स्वखर्चाने पार पाडली.भारत अजिंक्य राहिला.पण ट्रॉफी शिवाय खेळाडूंच्या पदरात कांहीच पडले नाही.त्यामुळे दानशूर लोकांनी पुढे येऊन बसवराजला मदत करावी असे आवाहन सलगर मधील हॉलीबॉल प्रेमींनी केली आहे.