एसपी तेजस्वी सातपुतेंचे ऑपरेशन परिवर्तन! अवैध व्यवसायातून सुधारलेल्यांना नोकरी

सोलापूर : अवैध हातभट्टी दारु तयार करणाऱ्या आणि विक्री करणाऱ्यांचे हात चांगल्या कामात गुंतले जावेत, या हेतूने पोलिस अधीक्षक तेजस्वी सातपुते यांनी "ऑपरेशन परिवर्तन' राबविले. आता ज्यांनी तो अवैध व्यवसाय सोडला, त्यांच्या पाल्यांसह उपेक्षित पारधी समाजातील सुशिक्षित तरुणांना आणि पोलिस पाल्यांसाठी जॉब फेअरचे आयोजन केले आहे. गुरुवारी (ता. 24) पोलिस मुख्यालयात एक हजार उमेदवारांच्या मुलाखती होणार आहेत.

वर्षानुवर्षे अवैध व्यवसाय करणाऱ्यांना कमी वेळेत ज्यादा पैसे मिळविण्याची आशा लागलेली असते. तरीही, पोलिस अधीक्षकांच्या ऑपरेशन परिवर्तनातून अनेकांच्या जीवनात सकारात्मक बदल झाला. काहींनी हॉटेल, कपड्याचे दुकान, पान तथा चहाची टपरी, शिलाई मशीन, खवा तयार करणे, चप्पल दुकान, किरणा दुकान सुरु केले. अवैध व्यवसायाचा शेवट हा खूप वाईट होतो आणि त्यात आपल्या मुलांचेच नुकसान असल्याची खात्री त्यांना झाली. ज्यांनी तो अवैध व्यवसाय सोडला, त्यांना पुन्हा तो व्यवसाय करू वाटू नये, याची खबरदारीही पोलिस अधीक्षकांनी घेतली आहे. शहर-जिल्ह्यातील विविध प्रकारच्या 20 कंपन्यांमध्ये पोलिसांची मुले, पारधी समाजातील मुले आणि ऑपरेशन परिवर्तनातून अवैध व्यवसायापासून परावृत्त झालेल्या मुलांकडून त्यांनी ऑनलाइन अर्ज मागवून घेतले. जवळपास एक हजार तरुणांनी नोकरीसाठी अर्ज केले आहेत. त्यांच्या आता मुलाखती होतील आणि त्यांच्या आवडीनुसार व शिक्षणानुसार त्यांना नोकरीची संधी मिळेल, असा विश्‍वास पोलिस अधीक्षक सातपुते यांनी यावेळी व्यक्‍त केला. त्यांनी आज (रविवारी) हैदराबाद रोडवरील मोतीवाला फंक्‍शन हॉलमध्ये पोलिस कल्याण नोकरी मेळाव्यानिमित्त तरुणांना मार्गदर्शन केले.

जॉब फेअरमध्ये असेल सातत्य
ऑपरेशन परिवर्तन, पारधी समाजातील सुशिक्षित तरूण आणि पोलिसांच्या पाल्यांना चांगल्या ठिकाणी नोकरी मिळावी, त्यांच्यासमोरील अडचणी कायमस्वरुपी दूर व्हाव्यात, यासाठी सातत्याने पोलिस प्रशासनाचे प्रयत्न सुरु राहतील, अशी ग्वाही पोलिस अधीक्षक तेजस्वी सातपुते यांनी दिली. गुरुवारी होणाऱ्या पोलिस मुख्यालयातील जॉब फेअरअंतर्गत एक हजार जणांच्या मुलाखती होतील. त्यासाठी सर्वांनी वेळेत उपस्थित राहावे, असे आवाहनही त्यांनी यावेळी केले.