'दामाजी कारखान्याने एफआरपी 14 टक्केसह ऊसदर जाहीर करावा, अन्यथा बेमुदत आंदोलन'

मंगळवेढा (सोलापूर) :  गाळप केलेल्या उसाची एफ आर पी प्लस 14 टक्के रक्कमेसह ऊसदर जाहीर करावा, अन्यथा दामाजी कारखान्याच्या प्रवेशद्वारावर शेकडो शेतकऱ्यांसमोर बेमुदत धरणे आंदोलन करण्याचा इशारा स्वाभिमानी शेतकरी संघटनेच्या वतीने निवेदनाद्वारे देण्यात आला.

हे ही वाचा : इंधन दरवाढीच्या विरोधात शिवसेना आक्रमक ; सायकल-बैलगाडी रॅली, जोडोमार आंदोलनातून आक्रोश

यंदाच्या गाळप हंगामामध्ये तालुक्यातील चार साखर कारखाने आहेत. त्यापैकी एक साखर कारखाना बंद असून तीन साखर कारखान्यांनी ऊस दर जाहीर न करता गाळप सुरू केले. त्यांनी जवळपास पाच लाखापेक्षा अधिक मेट्रिक टन उसाचे गाळप केले. दर जाहीर करावा म्हणून स्वाभिमानी शेतकरी संघटनेच्या वतीने मरवडे येथे ट्राॅली जाळण्याचा प्रयत्न केला. तसाच प्रकार शेतकऱ्याकडून बालाजीनगर येथेही झाला. या प्रकाराची गंभीर दखल घेत जिल्हाधिकाऱ्यांनी जिल्ह्यातील साखर कारखानदारांची बैठक घेत, त्या बैठकीत १५ तारखेपर्यंत याबाबत अंतिम निर्णय जाहीर करण्याच्या सूचना दिल्या असताना स्वाभिमानी शेतकरी संघटनेच्या वतीने याबाबतचे निवेदन दामाजी कारखान्याकडे दिले. 

हे ही वाचा : सोलापूरच्या बातम्या वाचण्यासाठी येथे क्लिक करा  

त्या निवेदनात त्यांनी म्हटले आहे की, गाळप केलेल्या उसाची तोडणी केल्यापासून 14 दिवसाच्या ऊस बिलाची रक्कम शेतकऱ्याच्या बँक खात्यामध्ये जमा करणे बंधनकारक असताना या नियमांचे पालन केले नाही. तरीही दोन दिवसात एफ आर फी प्लस 14 टक्के दर जाहीर करावा, अशी मागणी या निवेदनात नमूद केली. निवेदनावर पश्चिम महाराष्ट्र युवा आघाडीचे ॲड राहूल घुले, रोहित भोसले, दत्तात्रय गणपाटील, पांडुरंग बाबर, सुरेश बाबर, राहुल खांडेकर, दत्तात्रय गडदे यांच्या सह्या आहेत.

यंदाच्या हंगामात एफआरपीसह ऊस दर जाहीर करण्याबाबत दोन दिवसापूर्वी जिल्हाधिकारी यांच्यासमवेत बैठक झाली असून त्या बैठकीला कार्यवाही लवकरच करण्याबाबत ठरले आहे. अध्यक्ष सध्या परगावी गेले असून ते दौऱ्यावरून परत येतील, त्यावेळी याविषयासंदर्भात बैठक घेऊन तत्काळ हा प्रश्न मार्गी लावण्यात येईल.
- झुंझार आसबे, कार्यकारी संचालक, दामाजी साखर कारखाना

संपादन - सुस्मिता वडतिले