भीमा नदीत बुडालेल्या मामी-भाच्याचे मृतदेह पाहून फोडला कुटुंबीयांनी हंबरडा

पंढरपूर (सोलापूर) : तालुक्‍यातील चिंचोली भोसे येथील भीमा नदी (Bhima River) पात्रात काल शुक्रवारी (ता. 28) बुडालेल्या मामी आणि भाच्याचे मृतदेह आज (शनिवारी) दुपारी शोध घेत असताना नदी पात्रात सापडले. मामा सुग्रीव लोंढे यांच्याकडे तीनच दिवसांपूर्वी राहण्यास आलेल्या कासेगाव येथील जय दत्ता जाधव (वय 12) आणि त्याची मामी पायल सुग्रीव लोंढे (वय 18 ) यांचे मतदेह नदी पात्रातून बाहेर काढल्यावर कुटुंबीयांनी एकच हंबरडा फोडला. (The family was devastated to see their aunt and nephew drowning in the river Bhima)

तालुक्‍यातील कासेगाव येथील जय दत्ता जाधव हा त्याचा मामा सुग्रीव लोंढे यांच्याकडे तीनच दिवसांपूर्वी राहण्यासाठी चिंचोली भोसे येथे आला होता. गावातील काही महिलांसह काल (ता. 28) दुपारी पायल सुग्रीव लोंढे कपडे धुण्यासाठी नदीकडे गेल्या होत्या. त्या वेळी जय जाधव आणि सुग्रीव जाधव हे देखील सोबत गेले होते. पायल लोंढे या धुणे धूत असताना जय जाधव नदीपात्रात उतरला. तो बुडू लागल्याचे पाहून पायल लोंढे आणि अन्य एक महिला अशा दोघी नदीपात्रात पुढे गेल्या. त्या बुडू लागल्याचे पाहून जवळच असलेल्या सुग्रीव लोंढे यांनी त्यांना वाचवण्याचा प्रयत्न केला. एका महिलेला वाचवण्यात त्यांना यश आले, परंतु पायल आणि जय हे खोल पाण्यात बुडाले. काल दुपारपासून पोलिस आणि गावकरी त्या दोघांचा नदीपात्रात शोध घेत होते.

दरम्यान, आज शनिवारी दुपारी होडीतून शोध सुरू असताना चिंचोली भोसे येथे नदीपात्रात काही अंतरावर जय जाधव आणि पायल लोंढे या दोघांचेही मतदेह सापडले. मामाकडे तीनच दिवसांपूर्वी राहण्यासाठी आलेला भाचा आणि मामी या दोघांचा दुर्दैवी मृत्यू झाल्याने कुटुंबीयांनी हंबरडा फोडला. उपजिल्हा रुग्णालयात शवविच्छेदन केल्यानंतर दोघांचे मृतदेह त्यांच्या कुटुंबीयांच्या ताब्यात देण्यात आले. या प्रकरणी पंढरपूर तालुका पोलिस ठाण्यात नोंद करण्यात आली असून, पोलिस निरीक्षक किरण अवचर पुढील तपास करीत आहेत.