कोरे चेक घेऊन वकिलाने केली महिलेची बारा लाखांची फसवणूक!

वळसंग (सोलापूर) : ज्योती कुश सोनकांबळे (वय 27, रा. वळसंग, तालुका दक्षिण सोलापूर) यांना सोलापूर शहरातील विवेक रामचंद्र शाक्‍य, तानाजी धनाजी शिंदे यांनी समाजकल्याण विभागाकडून आर्थिक मदत मिळवून देतो असे म्हणून कोऱ्या चेकवर सही घेऊन बारा लाखांना फसवले (Fraud) आहे. 488/2021 भादंवि कलम 420, 468, 406, 384, 504, 506, 34 प्रमाणे वळसंग पोलिसांत याबाबत गुन्हा (Crime) दाखल करण्यात आला आहे.

याबाबत वळसंग पोलिसांकडून मिळालेली माहिती अशी, की ऍट्रॉसिटी प्रकरणात मनोधैर्य वाढीसाठी समाजकल्याण खात्याकडून पीडितेला आर्थिक मदत केली जाते. त्यासाठी ज्योती सोनकांबळे यांनी समाजकल्याण खात्यात जाऊन चौकशी केली असता तेथे सांगण्यात आले की, आमच्याकडे तुमचे कोणतेही कोरे सही केलेले चेक घेतले जात नाहीत. तुम्ही दिलेल्या खात्यावर आम्ही रक्कम जमा करीत असतो व सदरची रक्कम तुम्हाला मनोधैर्य योजनेखाली दिली जाते. त्यामुळे ती रक्कम तुमच्या वकिलांनी घेऊन तुमची फसवणूक केली आहे, असे सांगण्यात आले.

त्या वेळी फिर्यादीचे वकील शाक्‍य व तानाजी शिंदे यांना कोणतेही वकीलपत्र दिलेले नसताना त्यांनी फिर्यादीच्या भोळेपणाचा व अज्ञानपणाचा फायदा घेऊन स्वतःच्या फायद्यासाठी लबाडीने वेळोवेळी रोख 3,25,000 रुपये व चेकने 8,76,000 रुपये अशी एकूण 12,01,000 रुपयांची रक्कम घेऊन आर्थिक फसवणूक केली. तसेच ज्योती सोनकांबळे यांच्याकडून घेतलेले कोरे चेक समाजकल्याण कार्यालयास द्यावयाचे आहे, असे खोटे सांगून स्वत:च्या बॅंक अकाउंटवर वटवले आहे. तसेच सहा लाख रुपयांची खंडणी, शिवीगाळ व खोट्या गुन्ह्यात अडकवण्याची धमकी असे विविध आरोप वकील व त्यांच्या साथीदाराविरुद्ध करण्यात आले आहेत.

याबाबत वकील शाक्‍य याला पोलिसांनी अटक केली असून त्याचा साथीदार तानाजी शिंदे फरार आहे. पुढील तपास सहाय्यक पोलिस फौजदार धनसिंग राठोड हे करीत आहेत.

बातमीदार : दिनकर नारायणकर