मोठ्या आवाजाचे फटाके उडवणाऱ्यांना जागेवरच एक हजारांचा दंड!

सोलापूर : दिवाळीच्या (Diwali) निमित्ताने शहरभर फटाके (Firecrackers) विक्रीची दुकाने थाटली आहेत. परंतु, ध्वनी प्रदूषणाच्या अनुषंगाने शहर पोलिसांनी त्या सर्व दुकानांची तपासणी केली. बंदी असलेले मोठ्या आवाजाचे फटाके पोलिस (Police) कारवाईत जप्त करण्यात आले आहेत. पोलिसांनी अचानक ही कारवाई केल्याने सर्वच दुकानांमधून मोठ्या आवाजाचे बंदी असलेले फटाके पोलिसांनी ताब्यात घेतले. सर्वोच्च न्यायालयाचे (Supreme Court) आदेश व राष्ट्रीय हरीत लवादाच्या सूचनांनुसार ही कारवाई करण्यात आली आहे.

सोलापूर शहरात कायमस्वरूपी फटाके विक्री करणारी 13 दुकाने आहेत. तर दिवाळीच्या निमित्ताने शहरातील ठिकठिकाणी परवानगी घेऊन तात्पुरत्या स्वरूपात फटाके विक्री करणारी 136 दुकाने आहेत. दरम्यान, 30 ऑक्‍टोबरला सर्वोच्च न्यायालयाने दिलेल्या आदेशाचा आधार घेऊन शहर पोलिसांनी सोमवारी फटाके विक्री करणाऱ्या सर्वच दुकानांची झाडाझडती घेतली. त्यानुसार सदर बझार पोलिसांनी 13 दुकानांवर कारवाई केली आहे. दरम्यान, रात्री उशिरापर्यंत ही कारवाई सुरूच होती. त्या दुकानांमधील मोठ्या आवाजाचे फटाके, साखळी फटाके, बंदी असलेले फटाके जप्त करून पोलिस ठाण्यात आणले आहेत. फटाके व्रिकी करणाऱ्या दुकानांवर कारवाई केल्यानंतर आता पोलिसांनी रात्री आठ ते दहा या वेळेशिवाय अन्य वेळेत फटाके उडविणाऱ्यांवर कारवाई करण्याचा इशारा दिला आहे. दुसरीकडे, ज्यांच्याकडे बंदी असलेले मोठ्या आवाजाचे फटाके आढळतील, त्यांच्याकडून संबंधित दुकानांची माहिती घेऊन त्यांच्यावर कारवाई होणार असल्याचेही पोलिसांनी स्पष्ट केले.

फटाके फोडणाऱ्यांवरही आजपासून कारवाई

ध्वनी, हवा प्रदूषण करणाऱ्यांवर राष्ट्रीय हरीत लवादाने कडक निर्बंध लावले आहेत. नियमांचे उल्लंघन करणाऱ्यांकडून आता जागेवरच भरपाई वसूल केली जाणार आहे. त्यानुसार एखादी व्यक्‍ती मोठ्या आवाजाचे निर्बंध असलेले फटाके फोडत असल्यास त्याच्याकडून एक हजार रुपयांचा दंड वसूल केला जाणार आहे. तर ग्रुपने फटाके वाजविणाऱ्यांकडून तीन हजारांचा दंड वसूल केला जाणार आहे, अशी माहिती पोलिस उपायुक्‍त डॉ. वैशाली कडूकर यांनी दिली. शिवाय दिलेल्या वेळेतच सर्वांनी फटाके उडवावेत, असे आवाहनही त्यांनी यावेळी केले.