Baramati : दुधाच्या दरात वाढ; पवारांनी शेतकऱ्यांसमोरच फिरवला मुख्यमंत्री कार्यालयात फोन, मागितली शिंदेंची वेळ

सलगर बुद्रुक (सोलापूर) : दूध दरवाढीच्या (Milk Price Hike) प्रश्नासंदर्भात जाणकार दूध उत्पादकांना घेऊन मुख्यमंत्र्यांसोबत चर्चा करणार असल्याचं आश्वासन राष्ट्रवादी काँग्रेसचे अध्यक्ष तथा माजी केंद्रीय कृषिमंत्री शरद पवार (Sharad Pawar) यांनी दिलं. बारामती (Baramati) येथील त्यांच्या गोविंद बाग या निवासस्थानी त्यांनी दूध उत्पादकांशी चर्चा केली.

दुधाच्या दरातील घसरणीमुळं राज्यातील दूध उत्पादक शेतकरी मोठ्या संकटात सापडला आहे. एक लिटर दुधाचा उत्पादन खर्च जवळपास 35 रुपये येवढा आहे. आणि शेतकऱ्यांना 32 ते 33 रुपये एवढाच दूध दर मिळत आहे. त्यामुळं उत्पादन खर्चापेक्षा कमी दर दूध उत्पादकांना मिळत असल्याने शेतकऱ्यांचा पारंपारिक जोडधंदा असलेला हा व्यवसाय आतबट्यात आला आहे. त्यामुळं या सर्व समस्या घेऊन अडचणीत आलेल्या मंगळवेढा तालुक्यातील दूध उत्पादक शेतकऱ्यांच्या शिष्टमंडळानं आज पवारांची बारामतीत भेट घेतली.

यावेळेस पवारांनी दूध दराच्या प्रश्नासंदर्भात दूध उत्पादक शेतकऱ्यांशी सखोल चर्चा केली. सर्व शेतकऱ्यांची चर्चा झाल्यानंतर शेतकऱ्यांसमोरच मुख्यमंत्री कार्यालयात दूरध्वनी वरून संपर्क साधला व मुख्यमंत्र्यांची वेळ घेतली. येत्या दहा ते पंधरा दिवसांत या प्रश्नावर मुखमंत्र्यांशी चर्चा करून मार्ग काढण्याचा प्रयत्न करू, असं पवारांनी दूध उत्पादक शेतकऱ्यांना सांगितलं. यावेळी कृषिभूषण अंकुश पडवळे, माजी शिवसेना तालुका प्रमुख येताळा भगत, शिवाजी चव्हाण, इंद्रजित पवार, दादासोा पवार आदी दूध उत्पादक शेतकऱ्यांनी पवारांची भेट घेतली.