"हे सरकार काय मासिक श्राद्ध घालायची वाट बघतेय का?'

अकलूज-माळेवाडी ग्रामपंचायतीचे नगरपरिषदेत व नातेपुते ग्रामपंचायतीचे नगरपंचायतीत रूपांतर करण्याच्या मागणीसाठी तीनही गावांच्या नागरिकांनी 22 जूनपासून साखळी उपोषण सुरू केले आहे.

अकलूज (सोलापूर) : तीनही गावांची पुरुष मंडळी सरकार विरोधात प्रचंड आक्रमक झाली असताना आजवर महिलांनी पुरुषांना थोपवले. पण आत्ता महिलाच शांत बसणार नाहीत. तीव्र आंदोलन करतील. महिलांची आक्रमकता सरकारला महागात पडेल आणि त्यामुळे होणाऱ्या परिणामास सर्वस्वी सरकार जबाबदार असेल. उपोषणाच्या दहाव्या दिवशी उपोषणकर्त्यांकडून सरकारचा दहावा तर रविवारी तेरावा घालण्यात आला तरी सरकारला जाग येत नाही. आता हे सरकार काय मासिक श्राद्ध घालायची वाट बघतेय का, असा प्रश्न जिल्हा परिषद सदस्या शीतलदेवी मोहिते-पाटील (Zilla Parishad Member Sheetal Devi Mohite-Patil) यांनी उपस्थित केला. (Women in Akluj are becoming aggressive against the state government)

अकलूज (Akluj) - माळेवाडी (Malewadi) ग्रामपंचायतीचे नगरपरिषदेत व नातेपुते (Natepute) ग्रामपंचायतीचे नगरपंचायतीत रूपांतर करण्याच्या मागणीसाठी तीनही गावांच्या नागरिकांनी 22 जूनपासून साखळी उपोषण सुरू केले आहे. आज (सोमवारी) उपोषणाचा चौदावा दिवस उजाडला तरी शासन आंदोलनाची दखल घेत नसल्याबाबत खंत व्यक्त करत पत्रकारांशी बोलताना शीतलदेवी मोहिते-पाटील पुढे म्हणाल्या, अकलूज येथे सुरू असलेल्या साखळी उपोषणास चौदा दिवस झाले तरी दखल न घेणाऱ्या शासनाच्या विरोधात महिला आक्रमक होत तीव्र आंदोलन (Agitation) करणार असून, होणाऱ्या परिणामास सरकार जबाबदार असेल.

या वेळी माजी उपमुख्यमंत्री विजयसिंह मोहिते- पाटील (Former Deputy Chief Minister Vijay Singh Mohite-Patil), जिल्हा परिषद सदस्या सुनंदा फुले, सरपंच पायल मोरे, नातेपुतेच्या सरपंच कांचन लांडगे, फातिमा पाटावाला, रेश्‍मा गायकवाड, रेश्‍मा तांबोळी, नीता शिवरकर, ज्योती फुले, वैष्णवी दोरकर, सीमा एकतपुरे, श्रद्धा जवंजाळ, लीना जामदार, उज्ज्वला जामदार, मनीषा ढवळे, वैशाली पोरे, लीना मुळे, संजय साठे, कासीम तांबोळी, उत्कर्ष शेटे आदी उपस्थित होते. रविवारी निराई मागासवर्गीय बहुउद्देशीय सामाजिक संस्था, दयावान प्रतिष्ठान, शिवधैर्य फाउंडेशन, अकलूज मशिनरी स्टोअर्स असोसिएशन, संत शिरोमणी नामदेव महाराज युवक व महिला संघटना, हिंदू खाटीक युवक संघटना, स्वामी विवेकानंद गणेश मंडळ, शिव गर्जना या संघटनांच्या वतीने उपोषणास पाठिंब्याचे निवेदन देण्यात आले.